Vritet gazetarja e RFE në Kiev

Gazetarja dhe producentja e RFE, Vira Hyrych, është vrarë gjatë një sulmi rus me raketë në Kiev, që ka goditur banesën ku ka jetuar ajo.

Sulmi ka ndodhur dje ndërsa trupi i saj i pajetë është gjetur nën rrënoja mëngjesin e sotëm.

Vira Hyrych ka punuar për RFE prej vitit 2018. Paraprakisht, ajo ka punuar për kanalet televizive ukrainase.

Redaksia e RFE ka ngushëlluar familjarët e viktimës duke thënë se do ta kujtojnë si njeri të këndshëm dhe si një profesioniste.

Si pasojë e sulmit rus të 28 prillit në Kiev, dy katet e para të ndërtesës 25-katëshe janë shkatërruar pjesërisht dhe më pas ka nisur zjarri. Sipas autoriteteve të qytetit, katër njerëz tjerë janë dërguar në spital.

Sulmet në Kiev kanë ndodhur në ditën e njëjtë kur kryeqytetin ukrainas e ka vizituar Sekretari i Përgjithshëm i Kombeve të Bashkuara, Antonio Guterres.

Presidenti ukrainas, Volodymyr Zelensky, tha Rusia ka nisur sulmet në Kiev, menjëherë pas përfundimit të takimit me shefin e OKB-së.

Ministrja ruse e Mbrojtjes tha se sulmet kanë qenë precize dhe kanë pasur në shënjestër një zonë të industrisë së raketave. Autoritetet ukrainase nuk kanë raportuar për diçka të tillë.