Ambasadores Vakali, Kurti: Greqia ta njohë pavarësinë e Kosovës

Greqia t’u bashkohet shumicës së vendeve të Bashkimit Evropian dhe ta njohë pavarësinë e Kosovës. Ishte kjo kërkesë e Kryeministrit të Kosovës, Albin Kurti, në takimin prezantues që zhvlloi me shefen e Zyrës ndërlidhëse greke në Kosovë, Heleni Vakali ku teksa i dëshiroi mirëseardhje theksoi marrëdhëniet shumë të mira mes të dy vendeve dhe mundësitë e thellimit të tyre nëpërmjet rritjes së shkëmbimeve tregtare dhe rritjes së bashkëpunimit ekonomik dhe të investimeve.

Ambasadorja Vakali tha se është e nderuar për detyrën që ka marrë dhe që Greqia është mike e sinqertë dhe e fuqishme e Kosovës.

“Edhe pse ende nuk e njeh pavarësinë e Kosovës, Greqia ka arritur të zhvillojë marrëdhënie bilaterale pa kurrfarë problemi,” tha Ambasadorja Vakali duke u shprehur e impresionuar me potencialin e madh që ka Kosova dhe mundësitë që ekzistojnë për bashkëpunimin bilateral.

Shefja e Zyrës ndërlidhëse greke në Kosovë, Heleni Vakali, e vlerësoi me këtë rast angazhimin e qeverisë për vlera demokratike dhe për rezultatet në luftimin e korrupsionit.

Në fund, Kryeministri Kurti dhe Ambasadorja Vakali u pajtuan që duhet të vazhdojnë projektet e përbashkëta në arsim e kulturë dhe në organizimin e radhës të forumit ekonomik.