SHBA: Nuk po ndihmojmë Ukrainën që të vrasin gjeneralë rusë

Ministria amerikane e Mbrojtjes ka hedhur poshtë raportimet e mediave se ka dhënë informacione të inteligjencës mbi vendndodhjen e gjeneralëve rusë në fushëbetejë në Ukrainë, në mënyrë që forcat ukrainase ti vrasin. 

Zëdhënësi i Pentagonit, John Kirby, tha se është e vërtetë që SHBA furnizon forcat e Kievit me informacione të inteligjencës ushtarake “në mënyrë që ti ndihmojë ukrainasit për mbrojtjen e vendit të tyre”, por shtoi se është Ukraina “ajo që vendos nëse do ta merr në shënjestër ose jo gjeneralin rus”.

“Nuk ofrojmë informacione të inteligjencës mbi vendnodhjen e krerëve të lartë ushtarak në fushëbetejë dhe nuk marrim pjesë në vendimet për goditjet e ushtrisë ukrainase,” tha Kirby duke shtuar:

“Ukraina kombinon informacionet që ne dhe partnerët tjerë ju ofrojmë me të dhëna të inteligjencës që ata i mbledhin në fushëbetejë. Më pas vetë vendosin dhe ndërmarrin operacionet e veta,” tha Zëdhënësi i Pentagonit, John Kirby.

Ndërsa Këshilli i Sigurisë Kombëtare pranë Shtëpisë së Bardhë ka dënuar raportimet e New York Times si të “papërgjegjshme”.

Në fakt, New York Times dje ka raportuar se SHBA ka ndihmuar Ukrainën për vrasjen e 12 gjeneralëve rus.

“Shtetet e Bashkuara ofrojnë informacione të inteligjencës në fushëbetejë në mënyrë që të ndihmojmë ukrainasit në mbrojtjen e vendit të tyre,” tha Zëdhënësja e NSC, Adrienne Watson, duke sqaruar:

“Nuk ofrojmë inforamcione të inteligjencës me që llim që të vrasim gjeneralë rusë.”

Ndërkohë NBC News ka raportuar dje se me kërkesë të ushtrisë ukrainase, SHBA ka ndihmuar në lokalizimin e luftanijes ruse “Moskva” në Detin e Zi, ditën kur ajo u fundos.