Përfaqësuesit politikë të Luginës së Preshevës, vizitë zyrtare në SHBA

Kryetari i Komunës Bujanoc, Nagip Arifi, Ish-Deputeti i Parlamentit të Serbisë dhe kryetari i Partisë për Veprim Demokratik, Shaip Kamberi, kryetari i Partisë Demokratike të Shqiptarëve dhe Ish-Kryetari i Komunës Preshevë,  Ragmi Mustafa, dhe Ish-Kryetarja e Komunës Preshevë, Ardita Sinani, kanë nisur  një vizitë zyrtare në Shtetet e Bashkuara.

“Takimin e parë zyrtar e filluam me shefin e Misionit të Shqipërisë në OKB,” bënë të ditur sot Shaip Kamberi përmes rrjetit social Facebook duke e shoqëruar dhe me fotografi nga takimi me Ambasadorin Ferit Hoxha.

Sipas mediave lokale, ata do të takohen me kongresmenë, anëtarë të administratës së presidentit Biden, figura të tjera politike dhe të sigurisë si dhe përfaqësues të komunitetit shqiptaro-amerikan.

Ndryshe, kjo vizitë zhvillohet në kohën kur çështja e pasivizimit të adresave të shqiptarëve në Luginë është bërë shumë serioze dhe kur shqiptarët nuk kanë më asnjë deputet në Parlamentin e Serbisë.