Nesër Franca voton për Parlamentin e ri, Macron më afër shumicës
Nesër Franca voton në raundin e dytë të zgjedhjeve parlamentare, rezultati i së cilës konfiguron hapsirën manovruese të Presidentit Emmanuel Macron për pesë vitet e ardhshme. Pas raundit të parë i cili u zhvillua javën e kaluar, Macron ka shance të mëdha për krijimin e shumicës parlamentare.
Aleanca e qendrës e kryesuar nga Presidenti i Francës “Së bashku” ka marrë 25.75 për qind të votave. Aleanca e re e së majtës, komunistët, të gjelbërit dhe socialistët me në krye politikanin e majtë Jean Luc Melenchon ka marrë 25.66 për qind ose vetëm rreth 21.400 vota më pak se koalicioni i Macronit, në Francën ku rreth 48.7 milionë votues janë me të drejtë vote. Në vendin e tretë është partia e esktremit të djathtë të Marine Le Pen, e në vendin e katërt Republikanët e djathtë.
Koalicionit të Macronit “Së bashku” i duhen të paktën 289 mandate për shumicën absolute, siç arriti në zgjedhjet e kaluara të vitit 2017, kur arriti të marrë 350 mandate deputeti.
“Së bashku”, raporton BFMTV, mund të marrë 255 deri 295 ulëse në parlament, e koalicioni i Melenchonit, Unioni i ri popullor ekologjik dhe social “Nupes” nga 150 deri 200 ulëse, që është një shok i madh bazuar në rezultatet e zgjedhjeve të kaluara parlamentare.
E djathta me shumë pak mandate
E Djathta mund të marrë 55 deri në 75 ulëse parlamentare, përkatësisht shumë më pak se pesë vite më parë, deri sa e djathta ekstreme mund të marrë nesër nga 30 deri në 50 ulëse parlamentare. Në rast se kaolicioni qeverisës merr shumicën por jo absolute, atëherë kjo do të thotë se ai vazhdon të jetë me numrin më të madh të deputetëve në parlament por i duhet të lidhë aleanca dhe marrëveshje për projektligje të caktuara.
Në këtë rast, republikanët, që mund ta humbin statusin e partisë së parë opozitare, mund ta luajnë rolin kyç në Parlamentin e ri të Francës.
Analistët kanë frikë nga pjesëmarrja e vogël në zgjedhje, deri sa sondazhet flasin për një pjesëmarrje prej 44 deri në 47 për qind. Rezultatet e para të sondazheve priten sapo të mbyllen qendrat e votimit në orën 20:00.
Për Emmanuel Macron, këto zgjedhje parlamentare tregojnë nëse do të mund të zbatoj planet e tij gjatë mandatit të dytë, duke përfshirë reformën kontroverse pensionale dhe përmirësimet emergjente në arsim dhe shëndetësi. Macron, gjithashtu, dëshiron të përqendrohet në politikën e mbrojtjes së ambientit dhe të forcoj zhvillimin e energjisë bërthamore. Për këtë i duhet shumica në parlament.
