Komiteti i Ekspertëve: Rritja e humbjeve të jetës dhe infektimeve, nga qarkullimi i Omicronit
Komiteti Teknik i Ekspertëve ndërsa vlerësoi situatën epidemiologjike me koronavirusin dhe masat Anticovid tha se rritja e infektimeve me koronavirus gjatë javëve të fundit ka ardhur si pasojë e qarkullimit të variantit Omicron ndërsa konstatoi dhe numrin e humbjeve të jetës.
“Komiteti ka ndjekur me vëmendje zhvillimin e situatave epidemiologjike në vend. Pas një periudhe të stabilizuar të përhapjes së infeksionit, prej disa javësh ka filluar një rritje të të infektuarve, por edhe të sëmurëve dhe humbjeve të jetës. Trendi i rritjes është vënë re edhe javën e kaluar, ku numri i infektimeve është shtuar ndjeshëm, ku ka pasur dhe humbje të jetës. Kjo ka ndodhur nga qarkullimi i varianti Omicron,” tha Mira Rakacolli duke i bërë thirrje qytetarëve që të vaksinohen, si mjeti kryesor për parandalimin e infeksionit.
Ndërsa mjekja Silva Bino u shpreh se duhet të bëjnë vaksinën edhe ata që kanë kaluar infeksionin para një muaji.
“Vaksinimi është mjet i rëndësishëm në lidhje me parandalimin e formave të rënda, vdekjeve dhe shtrimeve në spital. Përqindja e vaksinimit ka rënë këtë javë, në krahasim me një javë më parë. Ndërkohë që vaksinimi me dozën e tretë ka shënuar një rritje të lehtë, por përsëri përqindja e vaksinimit ditor dhe javor mbetet e ulët, në krahasim me muajt paraardhës.
Sot në qarkullim është varianti BA5, për të cilin nuk kemi të dhëna të qarta lidhur me format që ky variant shkakton, apo vdekjet që shkakton. Kemi të dhëna të pakta edhe për transmetueshmërinë e këtij varianti. Deri tani ka transmetueshmëri të ngjashme me variantin BA2,” tha Bino duke përfunduar:
“Qytetarët duhet të bëjnë edhe dozën e tretë, të mos merren me diskutime “jo e kam kalur”. Çdo person që ka kaluar një muaj nga kalimi i infeksionit, duhet të bëjë dozën e tretë. Nuk ka asnjë lloj diskutimi për këtë gjë.”
Ndërsa shefja e Spitalit Infektiv, Najada Çomo duke konstatuar shtimin e numrit të pacientëve që kërkojnë ndihmë pranë Urgjencës dhe që të gjithë ata shtrohen në spital, tha se janë kryesisht persona të pavaksinuar:
“Në javët e para të qershorit kishim ulje të shtrimeve në spital, ku shifra shkoi deri në 4 pacientë, ndërsa në korrik shohim një shtim të pacientëve, që vijnë të kërkojnë ndihmë pranë Urgjencës. Të gjithë ata që vijnë për t’u konsultuar shtrohen në spital. Së paku 5-6 pacientë shtrohen në spital në ditë. Janë kryesisht persona pa vaksina, apo ata që kanë bërë vaksinimin e hershëm. Temperaturat e larta s’e kanë ulur numrin e të sëmurëve, të shtruarve në spital, por është shtuar numri, ndonëse jo në shifra të jashtëzakonshme. E rëndësishme është që grup-moshat më të prekura janë ato mbi 60-70 vjeçare,” tha Çomo ndërsa kreu i Komitetit të Ekspertëve, Mira Rakacolli tha në fund se vaksinimi mbetet mjeti më efikas i parandalimit të infeksionit, dhe se duhet të mbahet maska në ambientet e mbyllura, aty ku nuk ruhet distancimi social.
