Apeli i artistëve për Ramën dhe deputetët/ Mos na çoni drejt një përballjeje…

Artistët dhe aktorët, të mbështetur nga qindra mbështetës të opozitës dhe shoqëria civile, prej orës 10:00 kanë nisur protestën në mbrojtje të Teatrit Kombëtar, ndërsa pritet që Kuvendi të miratojë me votat e PS-së, pr/ligjin që i hap rrugën shembjes së godinës aktuale.

Aktori i njohur Bujar Asqeriu i ka bërë thirrje, deputetëve të mazhorancës të mos e kalojnë atë ligj ujqëror që kafshon artin, siç u shpreh.

“Kujdes me artistët! Nëse dhëmbët tuaja i ngulen atij Teatri, nuk do të harrohen kurë. Mos e kafshoni Teatrin!”, tha Asqeriu.

Ndërkohë që para seancës është lexuar edhe peticioni, i firmosur nga mijëra qytetarë, që kërkon ndaljen e çdo procedure që çon në miratimin e ligjit.

“I bëjmë thirrje Edi Ramës që të mos e kalojë ligjin sepse nëse e kalon ne do të përshkallëzojmë protestën tonë.  Mos e bëni këtë gjë, mos na çoni atje ku nuk do të donit të përballemi”, ishte mesazhi i përcjellë në fillim të protestës.