Masat e reja Anticovid në Mal të Zi, rikthehen maskat me detyrim

Për shkak të përkeqësimit të situatës epidemiologjike të shkaktuar nga koronavirusi, në Mal të Zi rikthehet mbajtja me detyrim e maskës në 15 ditët e ardhshme ndërsa autoritetet shëndetësore sërish i kanë bërë thirrje qytetarëve që të vaksinohen.

Drejtori i Institutit të Shëndetit Publik, Igor Galiç, tha se pas rritjes së numrit të të infektuarve dhe atyre të hospitalizuar, janë vendosur masa të reja Anticovid ku përfshihet dhe mbajtja e maskës me detyrim në institucionet publike, dyqane, farmaci dhe pika karburanti.

“Mbajtja e maskës me detyrim në hapësirat e mbyllura të aeroportit, stacionet e autobusëve dhe trenit. Nëse këto masa nuk përmirësojnë situatën epidemiologjike, do të pasojë mbajtja e maskës me detyrim në të gjitha hapësirat e mbyllura,” tha  Galiç duke theksuar se nga 12 Korriku, në Mal të Zi kanë vdekur 13 persona nga koronavoirusi, pesë prej të cilëve ishin të vaksinuar.

“Tetë prej tyre nuk ishin të vaksinuar. Pra, prej pesë personave të vdekur asnjëri nuk trajtohet si i imunizuar sepse që të gjithëve u kishte skaduar afati prej gjashtë muajve nga doza e fundit,” tha Galiç duke shtuar se mosha mesatare e të vdekurve të vaksinuar ishte 75 vjeç, ndërsa atyre të pavaksinuar 71 vjeç. Instituti i Shëndetit Publik e bëri të qartë se do jetë situata epidemiologjike ajo e cila do të vendos nëse do të jetë e domosdoshme doza e pestë e vaksinës.