Escobar sot në Kosovë, Analistët: Për marrëveshje para 1 Shtatorit!

Njohësit e rrethanave politike në Kosovë e shohin vizitën e  të dërguarit amerikan për Ballkanin Perëndimor, Gabriel Escobar, sot në Prishtinë dhe nesër të përfaqësuesit të posaçëm të Bashkimit Evropian për dialog, Miroslav Lajҫak, si përpjekje për arritjen e një marrëveshje para 1 shtatorit. Sipas tyre, Kosova dhe Serbia duhet të gjejnë zgjidhje para kësaj date, në mënyrë që zbatimi i vendimit  për reciprocitet, të mos përcillet me trazira.

Profesori i shkencave politike, Nexhmedin Spahiu, tha për Radio Kosovën se SHBA dhe BE po bëjnë përpjekje që Kosova dhe Serbia të mundë të arrijnë marrëveshje, në mënyrë që zbatimi i vendimit për reciprocitet të mos  përcillet me trazira në veri te vendit.

“Patjetër që kjo vizitë është trysni ndaj palëve, sepse nëse nuk arrihet marrëveshje deri në shtator, atëherë ose Qeveria e Kosovës do të poshtërohet e ta shtyjë një afat tjetër, ose do të këtë një ndeshje ndërmjet Policisë së Kosovës dhe bandave të presidentit Vuçiq në veri të Kosovës,” tha Nexhmedin Spahiu.

Ndërkaq, Gurakuq Kuqi tha për Radio Kosovën se Lajçak dhe Escobar janë të përkushtuar që para 1 shtatorit palët duhet të merren vesh të paktën për targa dhe letërnjoftim, sepse ndryshe mund të këtë përkeqësim të dialogut.

“Lajçak dhe Escobar e dinë se duhet të dalë diçka nga ky proces para 1 shtatorit, sepse nëse ne shkojmë në 1 shtator dhe fillon zbatimi i reciprocitetit ashtu siç është zotuar Qeveria, atëherë mund të kemi përkeqësim të dialogut,” tha Kuqi.  

Ndryshe, vizita e zyrtarëve të lartë evropianë dhe amerikanë vjen pas dështimit të bisedimeve të javës së kaluar në mes kryeministrit të Kosovës dhe presidentit serb, ku palët nuk ia dolën të dakordohen në lidhje me zgjidhjen e cila do evitonte përshkallëzimin e situatës në veri në fund. Mësohet se Lajҫak dhe Escobar do tentojnë përafrimin e qëndrimeve të palëve, në mënyrë që zgjidhja të gjendet më së largu me 31 gusht.