Pas takimit me Escobar, Osmani: Kosova do të vazhdojë të jetë e përkushtuar në dialog

Presidentja e Kosovës, Vjosa Osmani pas takimit me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, tha se Kosova do të vazhdojë të jetë palë konstruktive, e barabartë dhe e përkushtuar në procesin e dialogut.

”Në takim me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, potencova se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqe dhe stabilitet në vend dhe rajon,” tha Presidentja Vjosa Osmani duke shtuar se Institucionet e Kosovës janë në komunikim dhe koordinim të vazhdueshëm me partnerët tanë ndërkombëtar dhe çdo vendim i yni reflekton frymën kushtetuese të vendit tonë dhe vlerat tona demokratike.

Ndërkohë I dërguari i posaçëm i Shteteve të Bashkuara për Ballkanin Perëndimor, Gabriel Escobar, ka zhvilluar takim edhe me liderët opozitar, Memli Krasniqin e PDK-së, Lumir Abdixhikun e LDK-së e Ramush Haradinajn e AAK-së. Asnjëri prej tyre nuk u prononcua për media pas takimit i cili zgjati më shumë se dy orë dhe u zhvillua në rezidencën e Ambasadorit të Shteteve të Bashkuara në Kosovë.

Ndryshe, në kërkim të zgjidhjes për një marrëveshje ndërmjet Kosovës dhe Serbisë lidhur me çështjen e targave dhe të dokumenteve personale serbe në Kosovë, deri më 1 shtator, I dërguari i posaçëm i SHBA-së për Ballkanin Perëndimor, Gabriel Escobar, do të jetë në Kosovë dhe Serbi më 23 dhe 24 gusht, së bashku me Përfaqësuesin e posaçëm të Bashkimit Evropian në dialogun Prishtinë – Beograd, Mirosllav Lajçak.