Dalja nga monizmi, Berisha: Skenari, protestë dhe në rast nevoje mosbindje civile!

Situata në cilën ndodhet Shqipëria, Kryetari i Partisë Demokratike, Sali Berisha, e cilëson monizëm nga i cili siguron se do të dalim pavarësisht nga çmimi me skenarin e qartë: Protestë dhe në rast nevoje mosbindje civile

Konferencën e përjavshme, Kryetari i Partisë Demokratike sot e filloi duke sjell në vëmendje një zhvillim anti ekonomik mjaft të rëndë, një shpërdorim të tmerrshëm që po ndodh në fushën e energjisë.

“Anija që po sjell impiantet nga Bangladeshi për prodhimin e energjisë, në portin e Vlorës, ka hyrë në kanalin e Suezit. 760 milionë euro është e llogaritur nga specialistët më të mirë, kostoja për 2 vite që do të punojnë këto impiante, përfshirë këtu qiranë dhe naftën që shpenzojnë. Më poshtë keni të detajuar nga ekspertët koston e tyre.

Kostoja ditore e tyre është kjo: Për prodhimin e 1 megavati, këto impiante harxhojnë 220 litra naftë. Impiantet prodhojnë 110 megavat në 24 orë. Nëse e shumëzojmë me 220 litra, ata shpenzojnë 580800 litra naftë në ditë. 580800 litra naftë, nëse i shumëzojmë jo me 2300 sa është sot dhe më shumë, por vetëm me 1900 lekë, impiantet harxhojnë në ditë 949672 euro. Por kjo është vetëm nafta. Prodhimi ditor i energjisë është 2640 megavat. Përveç kostos së naftës, qiraja ditore është 91.117 euro. Në total, është 1.490.799 euro. Në rast se llogarisni çmimin e megavatit, këto 1.490.799 euro shpenzohen për prodhimin e 2640 megavat, prodhimi ditor. Do të thotë se 1 megavat kushton 398 euro, pra rreth 400 euro. Kostoja për dy vite qira, pra për 730 ditë del mbi 761 milionë euro,” tha Sali Berisha ndërkohë kaskada e Drinit po zbrazet në mënyrën më të pabesueshme dhe të rrufeshm.

“Rama justifikon këtë krim të shëmtuar për impiantet në Vlorë. Çfarë po bën Edi Rama tani për të dalë para shqiptarëve me këtë batërdi. Po bën në mënyrën më të pabesueshme zbrazjen e rrufeshme të kaskadës së Drinit. Çdo ditë kaskada ulet me mbi 50 cm në ditë. Sot kaskada është 274 metra, në një kohë kur me rregulloren ajo me datën 1 shtator nuk mund të jetë kurrë poshtë 284 metra. Ndalohet me ligj.

Edi Rama për justifikuar këtë krim të shëmtuar, për të ju thënë shqiptarëve se nuk ka energji në bursë, diga dhe të instalojë këto dy impiante në Vlorë. Ju informoj se këto impiante kanë funksionuar për 20 vite me radhë rresht në Khulna të Bangladeshit. Nga viti 2018 e deri më sot, ata kanë qenë pa funksion.”

Berisha sjellë me këtë rast dhe një zgjidhje energjetike, bashkëpunimin me Kosovën për energjinë, por jo, sepse Edi Rama e ka burim vjedhjeje këtë sektor.

“Kur ne ishim në qeveri, kishte vetëm një problem, ai i transmetimit, pasi Serbia në mënyrë plotësisht antitreg, mbante monopolet e transmetimit në rajon. Mbi këtë bazë Serbia bllokonte edhe funksionimin e interkonjeksionit Shqipëri-Kosovë. Pasi Gjermania i tregoi kartonin e kuq, dhe i tha se po e bëre këtë, kemi edhe ne një mjet tjetër për ty, të shkëpusim nga rrjeti evropian. E kështu Serbia u tërhoq nga ajo praktikë.

Edi Rama mund të merrej vesh me qeverinë e Kosovës dhe të vendoste trurin e përbashkët të digave dhe TEC-eve, i cili i kursen Shqipërisë e Kosovës, të paktën 20%. Ata janë termo, do të thotë natën, sasia e energjisë që prodhojnë TEC-et nuk konsumohen në Kosovë, dhe mund ta merrte Shqipëria e digat shkonin drejt një normalizimi. Nuk e bën këtë sepse e kanë burim kryesor, vjedhjeje. E tani luajnë me shëndetin e qytetarëve të Vlorës. Khulna e Bangladeshit nuk ka asnjë lidhje me Vlorë. Vlora është gji i thellë, ka Karaburunin, Sazanin. Problemet janë shumë komplekse. Kërkoj me urgjencë rishqyrtimin e këtij vendimi. Me 700 mln euro, ndërtohen minimumi 3 TEC-e si i Vlorës. Dhe TEC-et e kthejnë investimin brenda 7 vitesh. Por ky e la prej 9 vitesh dhe nuk mori një tub nga Semani ta qonte te TEC-i i Vlorës, por e futi në një proces me një çmim më të shtrenjtë se sa ka kushtuar ndërtimi i tij. Është një katastrofë kjo që po ndodh.”

Lideri i opozitës me këtë rast foli dhe për skenarin më të keq të cilin Edi Rama e paralajmëroi përmes ministres Balluku, rritjen e çmimit të energjisë; Por, Berisha foli dhe përgjigjen e PD: Shqiptarët do i përgjigjen në sheshe!

“Edi Rama po zbraz digat, po asgjëson kaskadën në mënyrë që tu thotë shqiptarëve, që koston nuk e kam 0.9 lekë, por 390 lekë dhe unë do të rris çmimin. E garantoj se Shqipëria do të derdhet në rrugë dhe do ti japë atë që meriton. Qëllimi është vetëm ky, po zbraz digat që të deklarojë se i vetmi burim për ne janë këto supergjeneratorë. Këta janë gjeneratorë të madhej, nuk janë TEC-e. Këta shpenzojnë shumë më tepër se një TEC. Por këta e sulfurojnë, helmojnë me squfur Vlorën. Këtë që mendon se do ti bëjë Vlorë, nuk do ta kapërdijnë kurrë. Prandaj jam edhe unë sot për t’i dalë përpara kësaj gjëje,” tha Kryetari i Partisë Demokratike duke shtuar se Edi Rama është problemi më madhor i shqiptarëve, pas Enver Hoxhës:

“Ka një dakordësi tjetër më madhore, ajo për ti dhënë duart Edi Ramës një minutë e më parë. Këtu PD-ja dhe PL-ja, partitë e vërteta opozitare, shoqëria civile etj, të gjithë janë bashkë për ti prerë biletën këtij njeriu i cili është shndërruar në problemin më madhor të shqiptarëve, pas Enver Hoxhës në politikë. Ky objektiv i tejkalon të gjitha problemet e tjera. Ne do ti bashkërendojmë këto në frontin e përbashkët për shpëtimin e Shqipërisë. Ai ka çdo ditë afera të paimagjinueshme,” tha Kryetari i PD, Sali Berisha, duke konkluduar se jemi në kushtet e një monizmi të plotë nga i cili do të dalim pavarësisht nga çmimi.

“Skenari është protestë dhe në rast nevoje mosbindje civile. Ne e kemi shpallur Ramën një armik të lirisë së shqiptarëve. Dhe nuk lëvizim nga ky pozicion sepse Rama u ka grabitur votën shqiptarëve dhe mbi këtë grabitje të votës ka rrëmbyer njëri pas tjetrit të gjitha pushtetet, atë gjyqësor, parlamentar, legjislativ, ekzekutiv dhe institucionet kushtetuese. Kjo është e vërteta dhe prandaj edhe ai nuk mund të pranohet. Ne jemi në kushtet e një monizmi të plotë nga i cili do të dalim pavarësisht nga çmimi.”