Albin Kurti: Sot kombin tonë e përbashkon edhe kjo abetare unike!

Sot kombin tonë e përbashkon edhe kjo abetare unike, tha Kryeministri i Kosovës, Albin Kurti, në ceremoninë e përurimit të Abetares së përbashkët Kosovë-Shqipëri, duke shtuar se kështu po materializohet frymëzimi i trashëguar ndër breza.

“E nderuar ministre e Arsimit në Shqipëri dhe në Kosovë, të nderuar autorë të abetares, të nderuar mësues dhe nxënës. Alfabeti ynë i përbashkët do të mësohet në një abetare të përbashkët. Abetarja e përbashkët shërben për një popull që ecën përpara i bashkuar. Fati i shkollës shqipe ka qenë i lidhur me fatin e kombit tonë. Sot kombin tonë e përbashkon edhe kjo abetare unike, kështu po materializohet frymëzimi i trashëguar ndër breza,” tha Albin Kurti duke mos harruar të kujtojë me nderim të gjithë ato pena që nuk u thyen, por shtruan rrugën e dritës, pavarësisht sakrificave të mundimshme ndërsa përfundoi:

“Jam i lumtur që kemi në dorë abetaren e përbashkët, që u zotuam që ta kemi në mbledhjen e përbashkët të qeverive tona. Do shpërndajmë edhe tekst për gjuhën për shqiptarët në mërgatë. Vetëm bashkë mund të shtyjmë përpara përparimin dhe dijen. Shkolla do të bëjë të mundur edhe edukimin vleror. Udha e shkronjave është e gjatë dhe vështirë, iu qoftë e mbarë rruga e diturisë për ju vogëlushë, nga ky libër përplot diell në fletët e tij”,

Ndryshe, me ceremoninë e përurimit të Abetares së përbashkët Kosovë-Shqipëri që u zhvillua në Amfiteatrin e parkut “Ali Podrimja” në Gjakovë, u përurua dhe fillimi i vitit shkollor me Abetaren unike të të gjithë fëmijëve shqiptarë kudo që jetojnë.

Në këtë përurim të Abetares së përbashkët Kosovë-Shqipëri morën pjesë edhe ministret e Arsimit të Kosovës dhe të Shqipërisë, Arbërie Nagavci dhe Evis Kushi.