Albin Kurti prezanton pakon e subvencioneve, nga shtatori 50 euro për zyrtarë publikë

Kryeministri i Kosovës, Albin Kurti, ka prezantuar sot pakon e re të subvencioneve për ta lehtësuar gjendjen e shkaktuar nga inflacioni, subvencionimin e atyre që kursejnë energji elektrike si dhe për mbështetje të bizneseve që rrisin pagat e punëtorëve.

“Nga shtatori do të ndahen nga 50 euro për zyrtarët publikë, ndërsa do të ketë pagesë të njëhershme prej 100 euro për punëtorët e ndërmarrjeve publike,” tha Albin Kurit ndërsa konkretizoi dhe pakon e re ekonomike që do të subvencionoj ata që kursejnë energji elektrike.

“Nga shtatori po ashtu pritet të subvencionohet energjia elektrike për të gjithë ata që kursejnë. Do të subvencionohet dyfish fatura, për muajt në të cilët qytetarët do të shpenzojnë më pak se në muajt e njëjtë të vitit të shkuar,” tha Kurti

Ndërsa Ministri i Financave, Punës dhe Transfereve, Hekuran Murati, tha se e keni parë që kjo qeveri çdo cent e kthen përsëri te qytetarët ndërsa sqaroi dhe subvencionimin e energjisë.

“Për shembull nëse janë shpenzuar 1000 kilovatë orë vitin e shkuar dhe sivjet 900, mund të konsiderohet se është bërë kursim prej 10 për qind. Për këtë përqindje do ta mbështesim subvencionimin e faturës 20 për qind. Dyfishin e kursimit që e bëjnë qytetarët”,,” tha Hekuran Murati,

Me këtë rast Kryeministri Kurti u zotua edhe për mbështetje të bizneseve që rrisin pagat e punëtorëve:

“Duke subvencionuar 50 për qind të rritjes së pagës për punëtorë, maksimumi 100 euro për tre muajt e parë,” tha Albin Kurti ndërkohë në muajin nëntor pritet të ndahen edhe nga 100 euro për studentët.

Ndryshe, kryeministri i Kosovës, Albin Kurti, tha se nga fillimi i mandatit kanë mbështetur qytetarët si në vitin 2021, po ashtu edhe në vitin 2022 duke theksuar subvencionimin për qytetarët, për faturat e energjisë, përkrahjen me mjete financiare e mbështetjen e lehonave.