Qeveria e Britanisë shpall zi kombëtare, Mbreti i ri do i drejtohet opinionit në orën 19:00

Qeveria e Britanisë sot zyrtarisht ka shpall fillimin e zisë kombëtare për Mbretëreshën Elizabeth II.

Në vendim jepen detajet mbi uljen e flamurit në gjysmështizë, informacionet mbi udhëtimet dhe aktivitetet tjera publike si dhe shërbimet ndërsa zia kombëtare do të përfundoj ditën e varrimit.

Qeveria u shpreh se nuk ka detyrime për anulimin e ngjarjeve sportive ose zhvillimeve tjera si dhe mbylljen e hapësirave për argëtim duke i lënë në diskrecionin e të drejtës individuale të organizatorëve.

Pallati Buckingham ndërkohë ka bërë të ditur se periudha e zisë për Mbretëreshën Elizabeth II do të zgjas deri shtatë ditë pas ceremonisë së varrimit, e flamujt në rezidencat mbretërore do të ulen në gjysmështizë deri mëngjesin pas pëfundimit të zisë. Rezidencat do jenë të mbyllura ndërsa qirinjtë mund të ndezen para tyre.

Sot këmbanat e Kishës do të dëgjohen në gjithë vendin në orën 13:00 dhe më pas në orën 14:00 me 96 të shtëna me top do të nderohet çdo vit i jetës së mbretëreshës në Hyde Park.

Në orët e pasditë Mbreti Charles do të takohet me Kryeministren Liz Truss, ndërsa në orën 19:00 ai do ti drejtohet opinionit. Njëkohësisht ceremonia kishtare do të mbahet në Katedralen e Shën Palit në Londër.

Pallati mbretëror ende nuk ka saktësuar ditën e ceremonisë së varrimit, por pritet të zhvillohet 11 ditë pas vdekjes së Mbretëreshës Elizabet II. 

Ndryshe, Mbretëresha Elizabet II ndërroi jetë dje në Pallatin Balmoral në Skoci.