Tre ekonomistë amerikanë fitojnë çmimin Nobel për Ekonomi

Çmimi Nobel për Ekonomi këtë vit iu dha tre ekonomistëve amerikanë për kërkimet mbi bankat dhe krizat financiare.

“Sveriges Riksbank 2022” u nda në mes të ish-kreut të Rezervës Federale të SHBA-së, Ben Bernanke, Douglas Diamond dhe Philip Dybvig, të cilët, siç thuhet, kanë përmirësuar ndjeshëm të kuptuarit tonë për rolin e bankave në ekonomi, veçanërisht gjatë krizave financiare, si dhe mënyrën e rregullimit të tregjeve financiare.

Komiteti për Çmimin për Shkenca Ekonomike në arsyetimin e tij shprehet se Ben Bernanke, Douglas Diamond, dhe Philip Dybvig kanë fituar sepse me hulumtimin e tyre treguan se përse shmangia e kolapsit të bankave është jetike.

“Gjetjet e laureatëve kanë përmirësuar aftësinë tonë për të shmangur edhe krizat serioze, dhe pakot e shtrenjta të shpërtimit”, tha Tore Ellingsen, kryetar i Komitetit për Çmimin për Shkenca Ekonomike.

Analiza e Bernanke mbi Depresionin e Madh në vitet ‘30 tregoi se si dhe pse nxitimi i njerëzve për të tërhequr depozitat e tyre nga sportelet e bankave ishte një nga arsyet kryesore sepse kriza ishte kaq e gjatë dhe e rëndë.

Diamond dhe Dybvig në punën e tyre analizuan rolin e rëndësishëm shoqëror që luajnë bankat në zbutjen e konfliktit të mundshëm midis kursimtarëve që duan akses në paratë e tyre dhe ekonomisë që ka nevojë për kursime për t’i investuar.

Fituesit e këtij çmimi që zyrtarisht quhet “Sveriges Riksbank Prize” do të fitojnë 10 milionë korona suedeze secili (rreth 900,000 dollarë) dhe do të jepen më 10 dhjetor.

Ndryshe, President i Rezervës Federale nga viti 2006 deri në vitin 2014, Ben Bernanke, aktualisht punon në Brookings Institute të Washingtonit. D.C. Diamond është profesor në Booth School of Business të Universitetit të Çikagos dhe Dybvig është profesor në Olin Business School të Universitetit të Uashingtonit në St. Louis.