Udhëtimet jashtë shtetit të Edi Ramës, nga viti 2013 bëri 234 fluturime – 132 me charter!
Hakerat iranianë kanë publikuar sot të dhënat personale të kryeministrit Edi Rama ku në materialin prej 65 faqeve ka të dhëna mbi pasaportën, numrin e telefonit, adresën zyrtare ku banon, si dhe udhëtimet e tij jashtë shtetit nga janari i vitit 2005 deri në maj të vitit 2022.
Me ardhjen në fronin e kryeministrit, përveç shtimit të hyrje daljeve dhe lëvizjes me linja ajrore, vërehet një numër i madh i fluturimeve të tij me linjat charter nga aeroporti i Rinasit.
Më 11 dhjetor 2013 ishte hera e parë që ka përdorur charterin si kryeministër, dhe deri në maj 2022 numërohen 132 flutuirime me avion persona, ndërkohë që 101 herë ka udhëtuar me linjat e rregullta.
Me publikimin e këtyre të dhënave ka reaguar dhe lideri i opozitës, Sali Berisha, duke e cilësuar si super abuzim faktin që 127 udhëtimet me avion taksi të Edi Ramës kushtuan 19 milionë euro!
“Të dashur miq, neobllokmeni Edi Rama ka krye si kryeministër 127 udhëtime me Charter apo avion taksi për menderen e tij. Çdo udhëtim me Charter kushton mesatarisht apo më së paku 150 mijë euro kurse ato të largëtat kushtojnë me gjithë parkingun rreth 250 mijë euro.
Por të llogaritura me çmimin 150 mijë euro fluturimi, Edi Rama ka shpenzuar vetëm avion taksi 19050000 Euro. Pra kryeministri i vendit më të varfër të Europës shpenzon për udhëtime me avion në dispozicion dhjetëra e dhjetëra herë më shumë se sa kryeministri i Austrisë, një vend dhjetëra herë më i pasur se Shqipëria,” shprehet Kryetari i Partisë Demokratike, Sali Berisha në reagimin e tij përmes rrjetit social Facebook duke përfunduar:
“Ky është një krim publik tejet i rëndë, është banditizëm qeveritar i përmasave gjigante. Në këmbë shqiptarë ta kërrejmë sa më parë! Këtu më poshtë keni datat dhe destinacionet e të gjitha udhëtimeve me Charter të Edi Ramës nga shtatori i vitit 2013 gjer sot!”
