Kohë protestash, Berisha: Ne tani nisim betejën, nuk është e thjeshtë, por do fitojmë!

Kjo do të jetë kohë protestash, tha Kryetari i Partisë Demokratike, Sali Berisha, para krerëve të degëve në Tiranë, sot kur PD ka hyrë në fushën e betejës, aty ku shqiptarët kërkojnë shpëtimin nga kjo klikë kriminale e Edi Ramës.

“Ne sot kemi hyrë në fushën e betejës. Duhet të kuptohemi, të gjitha përpjekjet tona të deritanishme kanë qenë përpjekje për tu ngritur në këmbë, për të dëshmuar veten tonë si opozitë e vërtetë, si PD e rithemeluar. Tani, ne vijmë në fillimin e betejës.

Vijmë në fillimin e betejës sepse shqiptarët, jo vetëm në Shqipëri, por kudo që janë presin nga PD-ja, opozita shqiptare, shpëtimin nga kjo klikë, nga ky njeri i cili ka vendosur monizmin më të shëmtuar në Shqipëri.

Monizmi i tij sot qëndron në rrafshin e shtetit ligjor, disa shkallë më poshtë se monizmi në Vietnamin socialist në të cilin Partia Komuniste është forcë udhëheqëse hegjemone me kushtetutë. Pra nuk është pluralizmi, siç thotë kushtetuta jonë, por është monizmi, por shtetin ligjor ata e kanë 4 shkallë më në rregull seç e kemi ne, në këtë situatë katastrofale.

Që Edi Rama duhet të largohet nga pushteti e kanë thënë mijëra herë shqiptarët, por tani ka ardhur koha që ta shndërrojmë në realitet këtë moto.

Nuk mund të qëndrojë në pushtet një njeri i cili me firmë dhe vulë vjedh qindra milionë euro taksapaguesve shqiptarë. Nuk mund të qëndrojë në pushtet një kryeministër që fluturon, udhëton me çarter 137 herë, dy herë më shumë se presidenti i vendit më të fuqishëm në botë dhe u thotë qytetarëve të shtetit të vet sikur të ishin dele, se unë e bëj për të promovuar avionin e ‘Air Albania’, paçka se avioni çarter ka koston, nga 100 deri në 300 mijë dollarë. Paçka se shkon nga Tirana në Nju Jork, dhe nga Nju Jorku në Tampa, Florida, për të parë me 5 mijë euro biletën me çarter. Dhe u thotë pastaj, se kjo më kushton sa gjysma e biletës biznes klas,” tha Sali Berisha duke shtuar se nuk ka njeri në botë që të tallet me qytetarët e vet, siç tallet ky. Nuk ka, nuk mund të ndodhë.

Pasi Kryeministri Edi Rama sfidoi opozitën nga Peshkopia, lideri demokrat i bëri të qartë se kjo do të jetë kohë protestash dhe folit konkretisht për protestën e paralajmëruar kombëtare të 12 nëntorit.

“Kemi caktuar datën 12 si ditën e protestës më të fuqishme që ka njohur Shqipëria, por kjo do të jetë kohë protestash. Mos të kemi asnjë iluzion. Nuk ka votim me Edi Ramën. Ky na sfidoi haptas në Peshkopi. Do ta bëjmë cunam. Në vend që si kriminel elektoral të ishte në burg, zotohet se prap do të na i prekë votat.

Ky e ka shndërruar në fiktiv pluralizmin, në fiktive PD-në, në fiktiv parlamentin. Ju nuk mund imagjinoni se çfarë klubi i neveritshëm është parlamenti shqiptar. Ju nuk mund të imagjinoni se si funksionon pa asnjë ligj e rregull.

Ne shkojmë aty për hir të zgjedhësve, por aty është turp të futesh. Nuk respektojnë asgjë. Sillen si rrugeçër, si me procedurat dhe fjalorin. Ne shkojmë aty vetëm për zgjedhësit, qytetarët, me vështirësira të jashtëzakonshme. Ne dorëzojmë ligje dhe aty sikur nuk është parlament, por sikur është një klub i PS-së, parti krimi dhe droge,” tha Berisha duke folur dhe për ligjet e depozituara.

“Kemi paraqitur ligjin e lustracionit. Nuk e paraqesin, sepse votojnë amendamentin e Taulant Ballës, i cili defakto i mbyll dosjet dhe nuk i hap. Nuk i hap dosjet, sepse thotë se kërkesa që të jepen dokumentet duhet të jetë në proporcion me interesin, që e përcakton Edi Rama.

Kemi dorëzuar rezolutën prej 3 muajsh, sikur nuk jemi deputet, rezolutën për gjenocidin në Kosovë. E mban Linda. Linda është një automate që zbaton porositë e Edi Ramës, që nuk mund ta mbajë kurrë. Ka përcaktime në rregulloren e parlamentit se si veprohet. Nuk ekziston. Të gjithë kanë një emër, Edi Rama, ata janë vasalë të tij dhe nuk duhet të merremi me ta, fare,” tha Berisha duke saktësuar se duhet të merremi me një njeri dhe ky është Edi Rama.

“Ky u thotë shqiptarëve se të udhëtosh me çarter më kushton sa gjysma e biletës së paraardhësit tim. Sikur shqiptarët hanë bar, dhe nuk e dinë se të urdhëtosh me çarter dhe të udhëtosh me linjë tregtare.

Urdhëroni se ç’bën me pedagogët, e diskutuam edhe në një mbledhje tjetër. Paguan shoferin e Fondit Shqiptar të Zhvillimit, 4 herë më shumë se një pedagog. Kjo është e qëllishme, si të largojmë edhe këta mësimdhënës nga Shqipëria dhe të mbyllim universitetet, ti shuajmë. Ky po krijon pasuri përrallore për veten e tij.

A e dini ju se sot në Shqipëri nuk jepet një leje ndërtimi me sipërfaqe më shumë se 200 metra pa firmën e kryeministrit. Ju garantoj se një centralizëm i tillë nuk ka ekzistuar kurrë edhe në diktaturën më të egër që ka pasur Europa dhe ka qenë ajo e Enver Hoxhës,” tha Berisha duke shtuar se kjo është vetëm si të vjelësh ryshfete në të 4 anët e Shqipërisë.

“Ky njeri i ka tejkaluar, ligje, kushtetutë, norma morale dhe çdo gjë. Ky njeri i ka bërë shqiptarët të huaj në vendin e tyre. I thoshte nxënësi në Kolonjë, shkollën e meremetove, por brenda bankat janë si janë, sepse vetë udhëton me çarter. Internet nuk kemi, sepse blihen instilacione 4 milionë. A mundet një njeri të tallet me një popull në këtë mënyrë, nuk mundet. E them edhe njëherë, tani jemi në betejë dhe secili demokrat e demokrate, duhet ta konsiderojë se ne jemi në betejë,” tha Kryetari i Partisë Demokratike duke siguruar krerët e degëve të Tiranës se PD do ta fitojë betejën sepse ka një kauzë të drejtë.

“Rama punon ditë e natë me Vuçiçin. Çfarë bën tani, falimenton krejt industrinë e birrës. Absolutisht nuk ka vend në botë që e bën këtë, përveç këtij dhe e bën për vëllezërit Karriç, e bën për birrën e Beogradit, Ballkanin e Hapur. Se janë 1 mijë e ca familje që ushqehen dhe marrin rrogat në këtë industri dhe që janë qindra milionë të investuara, kjo nuk ka rëndësi për të. Për të ka rëndësi se sa e peshojnë në para vëllezërit Karriç, kompani të sanksionuara nga BE-ja, për lidhje të ngushta me Llukashenkon në Bjellorusi.

Tani duhet ta pësojnë këtu edhe 1 mijë familje të tjera, e të nisen me gomone ku ti çojë fati. Nuk mund të tolerohet më. Le të thotë çtë dojë. Do të përballët me shqiptarët.,” u shpreh Kryetari i Partisë Demokratike, Sali Berisha, duke përfunduar:

“Ne tani nisim betejën, kjo nuk është betejë e thjeshtë, por do të fitojmë sepse kemi një kauzë të drejtë dhe po mbrojmë interesa jetike, jo tonat, jo personale, por të çdo qytetari shqiptar. Përveç klubit të hajdutëve rilindas, ata jo. Ata janë për tu marrë një e nga një dhe për të shkuar atje ku e kanë vendin, me në krye Edi Ramën.”