“Mosbindje civile”, Berisha: Skenari i protestës, do shpaloset gjatë protestës në 12 Nëntor!

Kryetari i Partisë Demokratike, Sali Berisha, në vijim të debatit mbi alarmin britanik për refugjatët shqiptarë, fillimisht falënderoi Mbretin Charles III për ndërhyrjen e tij, dhe, ndërsa hodhi poshtë dhe e cilësoi si të papërgjegjshme deklaratën e Kryeministrit Edi Rrama i cili fajësoi autoritetet britanike, ftoi forcat politike të Mbretërisë së Bashkuar të analizojnë shkaqet e shndërrimit të shqiptarëve në popull të gomoneve nga qeveria e Edi Ramës në mënyrë që të kuptojnë më mirë se çfarë po ndodh në Shqipëri.

Ndërkohë në pikun e propagandës së mediave në shërbim të Edi Ramës mbi pritshmërinë e protestave të dhunshme të 12 Nëntorit dhe ndërhyrjes së NATO-s, në konferencën e përjavshme Kryetari i Partisë Demokratike e bëri të qartë se PD do ti qëndrojë parimeve të protestave brenda spektrit të mosbindjes civile.

“Në Britaninë e Madhe, në media, parlament dhe qeveri, ka shqetësime serioze për fluksin e paparë të refugjatëve që kalojnë Kanalin me shpresën e një jete më të mirë. Gjatë një viti, ky fluks ka mbërritur në 12 mijë, nga 800 që ishte në vitin 2021. Pa dyshim, kjo përbën një situatë serioze shqetësuese dhe polemika është e kuptueshme dhe e pashmangshme.

Duke mos u pajtuar me asnjë etiketim ndaj refugjatëve shqiptarë nga mediat dhe politikanët, PD falenderon mbretin Çarles për ndërhyrjen e tij, PD hedh poshtë dhe cilëson si të papërgjegjshme deklaratën e Edi Rramës ku fajëson autoritetet britanike, duke treguar me gisht konservatorët britanikë. PD fton qeverinë, parlamentin dhe forcat politike të MB, të ndalen dhe të analizojnë shkaqet e vërteta të shndërrimit të shqiptarëve në popull të gomoneve nga qeveria e Edi Ramës. Kjo do i ndihmojë të kuptojnë më mirë se çfarë po ndodh në Shqipëri,” tha Sali Berisha në fillim të konferencës së tij të përjavshme duke rendit dhe shkaqet kryesore të shpopullimit të Shqipërisë:

-Votimi fiktiv i shqiptarëve përmes dhunimit masiv të zgjedhjeve nga Edi Rama. Me zgjedhjet fiktive, Edi Rama ka vrarë shpresën te shqiptarët se pushteti mund të ndërrohet me votë.

-Vendosja e monizimit absolut falë votimit fiktiv. Sot Edi Rama kontrollon të gjitha pushtetet në vend. Me reformën sorosiane ai ka në kontroll të plotë sistemin e drejtësisë. Ai kontrollon 10 përqind më shumë pushtet se diktatori i fundit komunist në Shqipëri.

-Lidhjet e tmerrshme të Edi Ramës me krimin dhe drogën dhe zëvendësimin e shtetit ligjor me të parin narkoshtet në Europë.

-Vjedhja e fondeve dhe pasurive publike dhe vendosja e sistemit të korrupsionit në vend. Me sistemin korruptim dhe vjedhjen e fondeve të vendosur nga Edi Rama, punët publike në Shsqipëri kushtojnë 7-10 herë më shumë se në vendet e BE-së. Vetë Edi Rama mori detyrën si kryeministër, i akuzuar nga prezenca e OSBE në Tiranë se ka të fshehura në bankat offshore 200 milionë euro dhe për këtë akuzë, Edi Rama nuk reagoi kurrë me asnjë formë kundërshtimi.

-Edi Rama jeton sot si kryeministri më i kushtueshëm në Europë. Ai ka realizuar me çartera 137 fluturime, përfshi këtu fluturime për të ndjekur ndeshje futbolli në Florida apo vakanca luksoze.

-Varfërimi progresiv i shqiptarëve nga politikat e Edi Rramës është shkak tjetër kryesor i shpopullimit të Shqipërisë. Në vitin 2013, shqiptarët kishin rrogën më të lartë në rajon, sot ata kanë rrogën më të ulët në rajon, 15-20 përqind më të ulët se Kosova, kurse çmimet e produkteve ushqimore janë 7 eri në 10 përqind se mesatarja e vendeve të BE, nafta shitet si në Zvicër dhe Gjermani.

-Së fundmi, një rol të padiskutueshëm luan herë-herë edhe korrupsioni politik ndërkombëtar për të siguruar mbështetje për regjimin monist të Tiranës,”

Me këtë rast, Berisha i dha përgjigje Edi Ramës edhe për përpjekjet e tij në konfiskimin e flamurit të PD.

“PD gjatë një viti, ka votuar më shumë se kurrë në historinë e saj dhe më shumë se çdo forcë politike. E ka bërë këtë sipas kushtetutës së saj dhe ka kompletuar një proces ligjor me votën e lirë të anëtarëve. Këtë proces, kërkon ta shkelmojë, në mënyrë antiligjore, antidemokratike, strikt armiqësore, Edi Rama.

Përveç këtyre procedurave, ka një vendim gjykate, në të cilin gjykatësi ka vendosur për këtë realitet, për Kuvendin, për logot, për vendimet e PD-së. Gjithçka është e ligjshme, e paligjshme dhe armiqësore është përpjekja e Edi Ramës për të konfiskuar flamurin e PD, flamurin e pluralizmit politik. PD rezervon çdo të drejtë t’i përgjigjet atij në mënyrat më të merituara. Ky është një problem që e kemi me Edi Rramën, nuk e kemi me tjetër,” tha Berisha duke sqaruar se Partia Demokratike në të gjitha takimet e saj, përveç disa takimeve në hotele, dhe një në një qytet, që të gjitha i ka pasur gratis.

“Kjo solli një sherr të madh midis Edi Ramës dhe bashkiakëve, madje pati ndërhyrje të paskrupullta edhe nga guvernatorja se si mund të ndodhë kjo. Por ja që ndodh. Bashkitë kanë një sallë që e ofrojnë për aktivitete dhe kjo është e vërteta e shpenzimeve.”

Lidhur me manipulimin e djeshëm në Gjykatën e Apelit ku u shty seanca e Lulzim Bashës kundër Lulzim Bashës, Kryetari i Partisë Demokratike u shprehë qartë se PD nuk ka në fokus asnjë njeri tjetër përveç Edi Ramës

“Mungesa e avokatit në seancën e djeshme në gjykatën e Apelit është makinacion i Edi Ramës. Nuk kemi në fokus asnjë njeri tjetër përveç Edi Ramës. Demokratët e dinë. Ai është njeriu që kërkon të konfiskojë flamurin e demokratëve. Ata, në kohën e duhur, do marrin udhëzimet përkatëse dhe do qëndrojnë sipas udhëzimeve.”

Në fund, për të mos i ngelur borxh propagandës së Edi Ramës përmes mediave në shërbim që flasin për protesta të dhunshme të opozitës më 12 Nëntor dhe ndërhyrjen e NATO-s, Kryetari i Partisë Demokratike, Sali Berisha ishte i prerë, se do i qëndrojnë parimeve të reagimit brenda spektrit të mosbindjes civile.

“Se cili është skenari i protestës, do shpaloset gjatë protestës. Ne i qëndrojmë parimeve të protestave brenda spektrit të mosbindjes civile, që është e pranueshme në manualet e protestave demokratike.”