Afati 48 orë për targat, Kurti: Koha e hapave të mëdhenj!

Nuk është koha për ambicie të vogla, është koha e hapave të mëdhenj, tha Kryeministri i Kosovës, Albin Kurti, pas mbledhjes së Qeverisë sduke sqaruar se afati prej 48 orësh për targat u shty për t’i dhënë një mundësi arritjes së një marrëveshje që ishte afër të ndodhte në Bruksel.

“Po bëhen përpjekje maksimale, jemi treguar konstruktiv e aktiv, e  asnjëra prej tyre nuk vlen për palën tjetër. Në takimet e tanishme kemi qenë të tillë e të tillë do të jemi edhe në takimet e ardhshme përfshirë edhe atë që zëvendësi im do ta ketë me Lajçakun e përfaqësuesin e Serbisë,” tha Albin Kurti i bindur se propozimi evropian i mbështetur nga Gjermania, Franca e SHBA duhet të vendoset në tryezë një orë e më parë.

“Nuk është koha për ambicie të vogla, është koha e hapave të mëdhenj. Unë si kryeministër e si Republikë jemi të gatshëm që propozimi i BE-së i mbështetur nga SHBA, Gjermania e Franca të vendoset në tryezë një orë e më parë.”

Marrëveshja ligjërisht e obligueshme

Para daljes publike, Kryeministri i Kosovës, Albin Kurti, para kabinetit qeveritar tha se në Bruksel shkon vetëm për marrëveshjen finale me Serbinë, derisa është shprehur këmbëngulës për të mos bërë pazare me çështje të sundimit të ligjit në vendin tonë.

“Ky është kuptimi, ndërkaq autorët e propozimit të BE-së e braktisën propozimin e tyre prandaj edhe takimi përfundoi. Sikurse me 18 gusht edhe këtë herë unë isha i fundit që lëshova ndërtesën e BE-së, sepse gjithmonë ekziston mundësia edhe për një përpjekje të fundit, dhe më duhet t’iu njoftoj që ka qenë edhe përpjekja e fundit.

Lajçak ka ardhur dhe e bëri edhe një përpjekje të fundit për një tekst që do ta përfshinte edhe propozimin e BE-së, mirëpo pastaj na njoftoi që presidenti i Serbisë nuk e kishte pranuar ndërkaq përfaqësuesi i Lartë i BE-së tashmë ndodhej në konferencë për media. Tek ne ekziston edhe qëllimi, edhe qëndrimi, edhe arsyet, edhe argumentet për të arritur marrëveshje ligjërisht të obligueshme, por ky duhet të jetë edhe qëllimi i ndërmjetësve,” tha Kurti duke shtuar se vendimi për targat nuk mund të jetë objekt i negocimit.

“Është vendim i Qeverisë. Ajo çfarë kemi treguar ne është zemërgjerësia jonë që t’i japim shanse jo vetëm ligjshmërisë e kushtetutshmërisë por edhe brengave të atyre për mundësitë e cenimit e paqes dhe sigurisë duke diferencuar qasjen e duke sekuencuar implementimin. Po i afrohemi numrit të 2 mijë të qortimeve dhe vërejtjeve dhe asnjë incident, asnjë ankesë, dhe dy muaj pastaj gjobitje jo konfiskim targash, por gjobitje këtë e parasheh edhe ligji.

Ne nuk e negociojmë vendimin, ne e kemi treguar zemërgjerësinë tonë sa i përket mënyrës dhe kohës së implementimit. Shtrohet pyetja pse e kemi sjellë ne këtë vendim në fund të qershorit. Ka ndodhur sepse 6 muaj është negociuar për targa në Bruksel dhe në fund kanë qenë 8 opsione. Prej këtyre 8 opsioneve po ua them nja tri kanë qenë më të përshtatshme për ne, e nja 5 jo, e Serbia nuk e ka pranuar asnjë i ka refuzuar të gjitha 8 opsionet,” tha kreu i qeverisë kosovare duke kujtuar se ky vendim nuk u mor as në prill kur Serbia i refuzoi 8 opsionet, as në maj, por në fund të qershorit.

“Vendimi ynë erdhi dy muaj pas dështimit të negociatave me fajin e Serbisë, e cila i ka refuzuar të gjitha 8 opsionet për targat. A e kuptoni çfarë zemërgjerësie të qeverisë ka përgjatë këtij viti por edhe të vitit që shkoi. Ne nuk kënaqemi teksa gjobisim, nuk është dëshirë, është detyrë. Jo dëshirë e individit, por obligim e detyrë sipas ligjit të shtetit tonë.

Njësoj sikurse këto janë çështje të sundimit të ligjit në vendin tonë nuk mund të jenë dorëheqjet e kthimet e zyrtarëve publik e shtetëror çështje të pazareve sepse që të gjitha janë të rregulluara me ligj. Ju e patë që deputetët e Listës Serbe dolën nga institucionet, e të tjerë prej tyre u kthyen dhe bënë betimin. Kjo është mënyra se si kthehen në institucione duke bërë betimin, duke respektuar ligjet e kushtetutën. Nuk jemi ne shtet diktatorial që vendosë se kush kur shkon e kush kur kthehet. Shteti ka kushtetutë e ligje  procedura,” tha Albin Kurti duke përmbyllur fjalën e tij para kabinetit qeveritar se takimi i nivelit të lartë duhet të jetë për qëllime të larta.

“Unë natyrisht pres që kjo të vazhdojë. Sot në Bruksel ndodhet zv/kryeminsitri Besnik Bislimi, mbase do të ketë edhe një takim me përpjekje që brenda këtyre 48 orëve të arrihet dakordimi. Ne e kemi edhe vullnetin edhe qëllimin e mirë.”

Kurti: Borell iu përshtat qëllimit të Serbisë

Para kabinetit qeveritar, Kryeministri i Kosovës, Albin Kurti, ka dhënë detaje për takimin tetorësh të nivelit të lartë me presidentin serb dhe zyrtarët e lartë evropian, që rezultoi pa marrëveshje.

Ftesa që e mori të premten e javës së shkuar nga kryediplomati evropian Josep Borell, tha Kurti, ishte e shoqëruar me një tekst me katër paragrafë që mëtonte të lëshohej si deklaratë në fund.

“Në paragrafin e parë bëhej ftesë për përqendrim me urgjencë në propozimin e BE-së, të përkrahur nga Gjermania e Franca për normalizim të marrëdhënieve. Në të tretin paragraf teksti bënte thirrje që të fillonin menjëherë bisedimet për propozimin e BE-së në nivel të lartë për të arritur  një marrëveshje para marsit 2023,” tha Kurti duke e pranuar se propozimin e Borellit e mirëpriti meqë paraqiste një bazë të mirë për diskutim.

“Në paragrafin e dytë ishte çështja e targave se bashku me çështjen e garancioneve për komunitetin serb që do të diskutoheshin në propozimin e BE-së, pra në marrëveshjen për normalizim,” tha kreu i Qeverisë së Kosovës duke shtuar se parakushti për targat kishte të bënte vetëm me pezullimin e veprimeve të Qeverisë sonë dhe jo me ndalimin e lëshimit të targave nga ana e Serbisë.

“Ne ishim të pajtimit që për t’i dhënë hapësirë bisedimeve për propozimin e BE-së të pezullonim fazën e dytë të vendimit për targat, por natyrisht atëherë kur Serbia ndalon së regjistruari makina me targa ilegale, sepse nuk ka kuptim të mos vazhdohet faza e dytë, të kalohet nga vërejtjet e qortimet te gjobat, të mos ekzekutohen gjobat e në anën tjetër të vazhdojnë të lëshohen targat ilegale.”

Kryeministri Kurti tha se ky propozim u pranua dhe ishte një e arritur e rëndësishme e takimit e sa për komunitetin serb në Kosovë, theksoi, ai, është komuniteti më i mbrojtur e privilegjuar në kushtetutën e Republikës.

“Kjo është rezultat i marrëveshjes gjithëpërfshirëse të Ahtisarit. Të drejtat për pakica në Kushtetutën tonë nuk i gjen në atë të Serbisë e as në shumë e shumë vende të tjera përfshirë edhe kushtetutat në vendet më të avancuara të BE-së,” tha Kurti duke përsërit se kryediplomati europian Borell ishte ai që fatkeqësisht e ndryshoi e premisën e negocimit.

“Ai filloi të insistonte në një marrëveshje që adreson vetëm masat e mirëbesimit, pezullimin e gjobave për targa. Qëllimi i madh u hoq nga agjenda, nevoja urgjente për propozimin evropian me mbështetje franko -gjermane u zhduk nga tavolina duke iu përshtatur qëllimit të Serbisë, presidenti i së cilës kishte ardhur në Bruksel jo për propozimin e BE-së, por për targat.”

Kryeministri para kabinetit të tij theksoi se në takimin e 18 gushtit, ishin dy pika të rendit të ditës, e para korniza e përgjithshme e marrëveshjes dhe  e dyta çështjet aktuale.

“Unë e mbështeta këtë strukturë të takimeve sepse liderët shtetëror thirren për të bërë marrëveshjen e madhe, pra e ripërsërisë unë nuk jam as polic, as komandant stacioni, as shef kadastri e as zyrtar dogane, që të merrem me gjithfarë çështjesh teknike të cilat dalin përgjatë bisedimeve. Ne jemi shtet me institucione e organe përkatëse,” tha Albin Kurti i prerë se në Bruksel shkon veç për marrëveshjen finale për normalizim me njohje reciproke.

“Ky është kuptimi, ndërkaq autorët e propozimit të BE-së e braktisën propozimin e tyre, prandaj edhe takimi përfundoi. Sikurse më 18 gusht edhe këtë herë unë isha i fundit që lëshova ndërtesën e BE-së,” tha Kurti duke sqaruar se në takimin e 18 gushtit, ishin dy pika të rendit të ditës, e para korniza e përgjithshme e marrëveshjes dhe e dyta çështjet aktuale ndërsa përfundoi:

“Unë e mbështeta këtë strukturë të takimeve sepse liderët shtetëror thirren për të bërë marrëveshjen e madhe, pra e ripërsërisë unë nuk jam as polic, as komandant stacioni, as shef kadastri e as zyrtar dogane, që të merrem me gjithfarë çështjesh teknike të cilat dalin përgjatë bisedimeve. Ne jemi shtet me institucione e organe përkatëse.”

Ndryshe, sot në mbledhjen e Qeverisë së Kosovës u miratuan dy projektligje, ai për Zyrtarët Publik dhe Ligji i pagave.

 “Projektligji adreson këtë problematikë dhe sjellë dallimin në më pak se pesë herë.  Në bazë të projektligjit, dallimi në mes të koeficientit të Presidentit si komandant suprem dhe ushtarit të thjeshtë të FSK-së është vetëm 3.21 herë, ndërsa dallimi mes pagës së presidentit dhe mjekut specializant është vetëm 1.5 herë, pra presidentja e ka pagën më të madhe se mjeku specializant vetëm 1.5 herë,” tha Albin Kurti pas mbledhjes së qeverisë duke saktësuar se këto projektligje do të hyjnë në fuqi pas miratimit në Parlament dhe dekretimit nga presidentja.