Rezoluta e PE, Vuçiç: Prifti i papunë, pagëzon edhe keca!

Presidenti i Serbisë, Aleksandar Vuçiç, akuzoi mediat se kanë raportuar gabimisht se Parlamenti Europian, PE, ka miratuar Rezolutën me të cilën Serbia duhet të harmonizoj politikën e jashtme me atë të BE sa i përket luftës në Ukrainë ndryshe do i bllokohen fondet e anëtarësimit.

Kujtojmë se PE ka miratuar dje Rezolutën me të cilën kërkohet që negociatat me Serbinë të përparojnë vetëm nëse Beogradi përshëndetë sanksionet ndaj Rusisë dhe bënë reforma të konsiderueshme. Përveç, kësaj, eurodeputetët kanë mbështetur edhe vendimin që Serbia mund të shfrytëzoj fondet e BE me të njejtat kushte.

Por Vuçiç thotë se PE nuk miratoi Rezolutë, por rekomandime ndërsa akuzoi mediat, raporton N1, që kanë raportuar se ndër këto rekomandime ndodhet edhe ajo që nga Serbia dhe Kosova kërkohet pranimi i ndërsjelltë.

“Nëse kërkesë e 79 për qind të zyrtarëve të Parlamentit Evropian është që të pranojmë pavarësinë e Kosovës, dhe ky është rekomandimi më i rëndësishëm, kjo konfirmon fjalët e mia që nëse vendosim sanksione ndaj Rusisë, nesër do na rrahnin shpatullat e pasnesër do shfaqet një rezolutë e re për nevojën e njohjes së Kosovës,” tha Presidenti i Serbisë duke bërë të ditur se mbrëmë ka biseduar me Brukselin për 20 minuta duke reaguar për çdo germë.

“Nuk jam shqetësuar veçanërisht për rekomandimet e tyre, prifti i papunë pagëzon edhe keca, thotë populli. Falemnderit për shqetësimin e madhë, por nuk jemi të interesuar për marrëveshje të ndërsjelltë me Prishtinën,” tha Vuçiç duke thënë sërish se nuk bëhet fjalë për rezolutë ndërsa përfundon.

“Çfarë kërkojnë është edhe më e rëndë se sa të vendosim sanksione, kërkojnë nga ne njohjen e ndërsjelltë. Pse ta fshehim nga njerëzit? Këtë e fshehin një pjesë e politikës dhe mediave sepse njerëzit do ta kenë të qartë se çfarë kërkojnë këta zyrtarë. Do të vazhdojmë ti dëgjojmë se çfarë thonë, e vendimet do ti marrim duke respektuar popullin tonë.”