Sot, shqiptarët janë më keq se kurrë!
nga Agim Popoci
Seanca e përbashkët e Parlamenteve të Shqipërisë dhe Kosovës për nderë të 110 vjetorit të Ditës së Flamurit dhe Pavarësisë ndër shumë marrëzi që i serviri syrit dhe logjikës parlamentare e kmbëtare, kishte dhe një fjalim të Kryeministrit Edi Rama me shumë të pavërteta që u lartësuan me një xhevahir mashtrimi që qartëson dhe faktin pse shqiptarët sot janë në këtë derexhe!
“Sot shqiptarët janë më mirë se kurrë në marrëdhënie me njëri-tjetrin dhe me të huajt,” tha Edi Rama jo vetëm duke e thënë këtë të pavërtetë por duke sqaruar një herë e mirë se çfarë është për Kryeministrin e Shqipërisë e mirë dhe çfarë shqiptare!
Në pamje të parë, sikur kuptimi i të mirës shqiptare nga Edi Rama të trajtohet edhe nga pikëpamja artistike, ose dhe simbolikat që përdor, sërish çalon në kuptimin si të mirës ashtu dhe shqiptares!
Në seancën e përbashkët që organizoi Edi Rama, nuk do të ishte vetëm mirë por edhe shumë shqiptare për nder të Ditës së Flamurit, që të ishin prezent edhe deputetët shqiptarë të Maqedonisë Veriut, Serbisë, Malit Zi, dhe të gjithë deputetët shqiptarë kudo në botë, në mënyrë që të zë vend dhe togfjalëshi i tij propagandistik se “sot shqiptarët janë më mirë se kurrë në marrëdhënie me njëri-tjetrin”.
Por, ja që nuk janë!
Mirëpo, edhe këta deputetë që morën pjesë në këtë seancë, që Kryeministri e cilësoi solemne, u ndien shumë më pak shqiptar se homologët e tij! Ata, dhe jo vetëm, sa herë nisen drejtë Shqipërisë janë të fyer, edhe sot kur Serbia nuk arrin ti ndaloj më që të shkojnë në shtetin amë.
Normalisht, Edi Rama nuk e kupton as të mirën dhe as shqiptaren, madje ekzaltohet si në rastin e Ramush Haradinajt kur dëgjon se ai si Kryeministër me rastin e vizitës zyrtare në Tiranë ishte ndaluar te trau i Qet Kastratit për të paguar taksën në Rrugën e Kombit, gjë që nuk i kishte ndodhur në Maqedoni të Veriut!
Sikur sot shqiptarët të ishin më mirë se kurrë në marrëdhënie me njëri-tjetrin, në fjalën e Kryeministrit Edi Rama mund të zinte vend Bedri Pejani nëse nuk donte të acaronte marrëdhëniet me Presidentin e Serbisë, Aleksandar Vuçiç, duke përmend Rexhep Mitrovicën, ose dhe Mustafa Kruja!
Por, jo, kjo dëshmon dhe alergjinë që ka ky njeri për çdo shqiptarë që jeton mbi Fushë Krujë, dhe po lë gjurmë të thella edhe në mënyrën e qeverisjes !
Mungesa e Presidentes së Kosovës, Vjosa Osmani, i ra në sy çdo shqiptari, por për Edi Ramën nuk ishte dhe hataja sepse përgjigjen u kishte dhënë shqiptarëve me kohë duke abandonuar Presidentin e Republikës që zgjodhi vetë, Bajram Begajn!
Ndoshta kjo është një përgjigje për çobanët që ka në Grupin e tij Parlamentar që ende nuk e dinë se çfarë quhet punë për popullin shqiptarë, kujt i shërben Ballkani i Hapur e kujt Procesi i Berlinit, Porti i Jahteve ose Porti i Durrësit, a duhet vrarë apo porositur vrasje, por të gjithë të tjerët e dinë se një shtet ka dhe një President pavarësisht nëse ai komandohet nga Kryeministri, si në rastin e Shqipërisë, ose është President prej vërteti, si në rastin e Kosovës!
Sot shqiptarët janë më mirë se kurrë në marrëdhënie me njëri-tjetrin, tha Edi Rama por sot shqiptarët shohin se Kryeministri i Shqipërisë e trajton Presidenten e Kosovës më keq se kurrë më parë, madje shumë më keq se paraardhësi i tij Enver Hoxha. Kjo bëhet edhe më shqetësuese, kur shqiptarët shohin nga ana tjetër marrëdhëniet e shkëlqyera që Edi Rama ka me Presidentin e Serbisë, Aleksandar Vuçiç! Në këtë rast mbesin të zhgënjyer dhe serbofilët e Tiranës kur shohin se këto marrëdhënie nuk i shërbejnë as edhe një shqiptari të ndyer; Të mos flasim pastaj për rastet kur Vuçiçit i mbushet mendja se mund ta sulmoj Kosovën dhe çon gjithë armatimin e rëndë që ka në kufirin kosovar, të gjithë flasin për këto tensione dhe angazhohen si ti qetësojnë palët përveç Edi Ramës i cili zhduket nga faqja e dheut!
Të jemi të qartë, sot shqiptarët nuk janë më mirë se kurrë në marrëdhënie me njëri-tjetrin, jo pse Edi Rama ka iluzione për marrëveshjet që me shumë pompozitet janë firmosur me Kosovën dhe ato nuk zbatohen, sepse nuk ka shqiptarë normal mbi këtë tokë që e ka menduar ndonjëherë se ajo që premton Kryeministri Rama do përmbushet!
Por, në këtë tokë të ngopur me gjak, sot shqiptarët janë më keq se kurrë në marrëdhënie me njëri-tjetrin dhe me të huajt, sepse Shqipëria nga 110 vjet shtet sa është, 64 vjet u qeverisë nga duart e terroristëve komunistë! Dhe, mirë, s’ka si të jetë, sepse ky lloj regjimi ka mbjellë dhe mbjellë vetë gjak!
Lartmadhnia e Spiropalit edhe mund të na rrëfej me një përvjetor tjetër, se çfarë të mire i sollën PPSH dhe PS këtij vendi që deri më sot nuk ka pa njeri, shqiptarë jo se jo; Kur ti bie ndërmend të flas shqip dhe jo përçartë!
