Video/ “Kundër dhunës seksuale në konflikt”, Gërvalla kundërshton praninë e Daçiçit!

Duartrokitje të shumëta nga të pranishmet në sallë, viktima të dhunës seksuale në konflikt, nga vende të ndryshme të botës, mori ministrja e Punëve të Jashtme dhe Diasporës e Kosovës, Donika Gërvalla, jo për përgjigjen që dha por për refuzimin që bëri të përgjigjet në Konferencën kundër Dhunës Seksuale në Konflikt, PSVI, në Londër ku ishte ftuar të flasë edhe ministri i Punëve të Jashtme të Serbisë, Ivica Daçiç.

E pyetur se “cilat janë mangësitë që ka identifikuar Kosova në raport me dhënien e ndihmës për viktimat e dhunës seksuale në konflikt,” Zv/Kryeministrja dhe ministrja Donika Gërvalla duke refuzuar të përgjigjet për shkak të pranisë së Ivica Daçiçit, tha se ai është një nga autorët e këtyre krimeve, si dora e djathtë e diktatorit Sllobodan Millosheviç, reagim i cili u mirëprit nga viktimat e pranishme në sallë, të cilat disa herë e ndërprenë fjalën e saj me duartrokitje.

“Drejtësia është gjithmonë kyçe në këtë çështje, pra çështja e sjelljes së drejtësisë për viktimat e dhunës seksuale në konflikt, është kombëtarisht dhe ndërkombëtarisht detyrë e secilit”, e nisi fjalimin e saj ministrja Gërvalla duke shtuar:

“Si një vend që ka dalë nga gjenocidi, më pak se 30 vjet më parë, nuk besoj se mund t’ju tregoj shumë ju, se si të merreni me dhunuesit, e kryersit e kësaj dhune në vendin tonë, sepse ata kanë ardhur nga jashtë vendit,” tha ministrja Gërvalla duke folur për luftën e fundit në Kosovë dhe krimet e kryera nga Serbia në Kosovë.

“Prandaj pyetja që kam unë sot këtu për ju dhe të gjithë është se si autorët duhet të përballen dhe të mbahen si llogaridhënës për atë çfarë kanë bërë,” tha duke shprehur dhe irritimin për përbërjen e panelit i cili sapo përfundoi:

“Jam paksa e shokuar nga përbërja e panelit të fundit, me prezencën e arkitektit kryesor për kryerjen e gjenocidit në Ballkanin Perëndimor, kryesisht në Bosnje Hercegovinë dhe në Kosovë. Ta kemi këtu arkitektin kryesor, që të na tregojë  këshilla, në prani të viktimave dhe të mbijetuarave të kësaj dhune, na vë në mëdyshje që të mendojmë për vetë kuptimin e  kësaj Konference,” tha Gërvalla e cila u prit me duartrokitjet e viktimave të pranishme në sallë.

Si mund të flitet për mangësitë e trajtimit të këtyre rasteve të dhunës në Kosovë, tha ajo, kur përballë të mbijetuarave të dhunës seksuale në konflikt, që ishin të guximshme mjaftueshëm, të vijnë, të tregojnë se nuk janë duke u dorëzuar, se duan për vetën dhe fëmijët e tyre një perspektivë, e që janë ulur në këtë sallë, në anën tjetër të përballen me faktin se kjo konferencë është edhe një konferencë më shumë.

“Sepse këtu në vendin ku jam ulur unë, ishte një nga kryersit e këtyre krimeve. Dhe kjo duhet të ndryshojë,” tha ministrja Gërvalla.

Drejtuesi i panelit nuk e kishte idenë se për cilin perosn po fliste shefja e diplomacisë kosovare, i cili u ndihmua me zë të ulët nga një e ftuar, gjithesi “ndihma” u dëgjua nga mikrofoni:

“Flet për Ivica Daçiçin!”

Edhe vetë ministrja Gërvalla e sqaroi se për kë po fliste, dhe duke vazhduar shtoi:

“Ky është ministri i Punëve të Jashtme të Serbisë, dora e djathtë e Sllobodan Millosheviçit në vitet 1992-2000. Kur flasim kaq shumë për viktimat dhe të mbijetuarat, duhet ta kemi së pari repsektin e tyre, e pastaj të flasim për rrethanat,” tha Zv/Kryeministrja e Kosovës duke u ndërprerë disa herë gjatë fjalës nga duartrokitjet e të pranishmeve.

“Më falni, por nuk dua të përgjigjem në pyetjen tuaj, jo në mungesë të respektit ndaj jush personalisht, por duke u përpjekur të ndihmoj çdo të mbijetuar për të mos pasur nevojë që të përballet në një vend neutral me autorët e këtyre krimeve,” tha Donika Gërvalla e prerë.

“Ky është obligimi ynë, si politikanë, si drejtësi dhe si gjithçka tjetër”.

Konferenca Ndërkombëtare për Parandalimin e Dhunës Seksuale në Konflikt mbahet nga 28-29 nëntor në Londër të Mbretërisë së Bashkuar, nën kujdesin e Ministrisë së Punëve të Jashtme të Britanisë së Madhe.

Konferenca i kushtohet reagimit global ndaj dhunës seksuale në konflikt, parandalimit të saj, mbështetjen e të mbijetuarve dhe fëmijëve të lindur nga dhuna seksuale në konflikt, si dhe nxitjen e veprimeve dhe praktikave më të mira për të krijuar përgjegjësi ndaj autorëve të kësaj dhune.

Në këtë konferencë, ministrja Gërvalla merr pjesë me ftesë të Sekretarit të Jashtëm të Britanisë së Madhe, James Cleverly.