Kuvend, PD nuk merr pjesë në seancë/ Spaho: Manipuluat votat në votimin për ligjin e Teatrit (video)

Partia Demokratike nuk do të marrë pjesë në seancën e sotme në Kuvendin e Shqipërisë. Po kështu edhe Lëvizja Socialiste për Integrim ka bërë të ditur një vendim të tillë.

Shkaku është manipulimi i votimit në seancën e fundit parlamentare, ku me votat e socialistëve u miratua ligji për Teatrin, që i hap rrugën shmebjes së godinës aktuale të Teatrit Kombëtar.

Kryetari i Grupit Parlamentar Edmond Spaho, duke mbështetur kolegun e tij të LSI-së, Petrit Vasili, tha se mazhoranca ka manipuluar votimin në rastin e ligjit për Teatrin, i miratuar nga Kuvendi në seancën e së enjtes së kaluar me 75 vota.

Opozita, PD dhe LSI, pretendon se të paktën një deputet i saj, nuk ka qenë i pranishëm në seancë, ndërkohë që rezulton të kenë votuar pro ligjit.

“Ky është manipulim i pastër në një votim për një ligj mjaft të debatueshëm, që kundërshtohet nga artistët dhe aktorët. Akti i manipulimit është i papreçedent, është një akt i shëmtuar dhe ky nuk është rasti i parë kur përballemi me çudira të tilla. Jemi privuar nga e drejta për të folur.

Mendoj se kjo është një çështje mjaft e rëndësishme, nuk mendoj se ka çështje më të rëndësishme sesa ajo kur opozita thotë se ka një manipulim të votimit. Sot të paktën prisnim që të na jepej një përgjigje për pretendimet tona”, tha Spaho, duke shtuar se vullneti i opozitës jo vetëm po privohet nga e drejta e fjalës, por vullneti i saj po denatyrohet.