“Tymi i bardhë në KLP apo…”, Yuri Kim: Falemnderit Kryeministër Edi Rama!
Ndërsa sot në KLP vazhdon procesi i zgjedhjes së kreut të ri të SPAK, Ambasadorja e SHBA në Tiranë, Yuri Kim, përkundër përplasjeve të ashpra me Kryeminstrin Edi Rama, i dërgon një falënderim po këtij Rame duke bërë të ditur se kishte zhvilluar një takim produktiv.
“Faleminderit Kryeministër Edi Rama, ministër i Mbrojtjes, Niko Peleshi dhe Shefi i Shtabit Gjeneral Kingji për një takim produktiv këtë mëngjes për të rishikuar progresin historik për të forcuar bashkëpunimin SHBA-Shqipëri. 2022 shënon vitin e pranisë së parë të qëndrueshme ushtarake amerikane në Shqipëri,” shprehet Yuri KIm përmes rrjetit social Twitter duke shtuar:
“Ne mezi presim të punojmë ngushtë me Shqipërinë në vitin 2023 për të siguruar që mbështeja e Shteteve të Bashkuara për trajnim dhe pajisje të plotësojë nevojat e Shqipërisë, si dhe kërkesat e aftësive dhe ndërveprimit të NATO-s. Gjithashtu mezi presim ‘Defender Europe 2023’,” shprehet Ambasadorja e SHBA në Tiranë duke përfunduar:
“Jemi krenarë që jemi gjithmonë krah për krah.”
A është ky falenderim i Ambasadores amerikane Yuri Kim një ditë pas përplasjes së fortë me Kryeministrin Edi Rama, një “tymë i bardhë” për zgjedhjen e kreut të SPAK mbetet për tu parë pasi palët janë barrikaduar qartë në mes Dumanit dhe Kondilit, përkatësisht Kim dhe Ramës.
Ndryshe, pas kërkesës së ambasadores amerikane Yuri Kim që procesi i zgjedhjes së kreut të Prokurorisë së Posaçme mos të jetë i ndikuar nga ata që kanë interes për të kufizuar apo manipuluar hetimet sepse drejtësia duhet të jetë e verbër ndaj pushtetit, Kryeministri Edi Rama dhëmë për dhëmbë u përgjigj se kreun e ri të SPAK nuk e zgjedh Qeveria por as Ambasada amerikane.
