Haradinaj u takua me kancelaren Merkel

Gjatë punimeve të Samitit BE – Ballkani Perëndimor në Londër, kryeministri i Kosovës, Ramush Haradinaj, ka zhvilluar takim me kancelaren e Gjermanisë, Angela Merkel, raporton KTV.

Në takimi është biseduar për marrëdhëniet bilaterale ndërmjet dy shteteve, për mundësitë e thellimit të bashkëpunimit , për proceset e përgjithshme në Kosovë, për përmbushjen e obligimeve të Kosovës në raport me BE-në, si dhe për procesin e finalizimit të dialogut me Serbinë.

Haradinaj vlerësoi rolin e jashtëzakonshëm të Gjermanisë në proceset jetike të shtetndërtimit të Kosovës.

“Partneriteti strategjik ndërmjet Kosovës dhe Gjermanisë është i një rëndësie të veçantë, duke njohur rolin dhe kontributin e Gjermanisë edhe në procesin e Berlinit për vendet e Ballkanit Perëndimor, e cila i ka hapur rrugë Kosovës që të trajtohet në mënyrë të barabartë me vendet tjera të rajonit. Kosova është e përkushtuar që ta avancojë këtë partneritet. Parku Inovativ dhe Trajnues në Prizren është një dëshmi e radhës, që vendi ynë është i përkushtuar për prezencën ekonomike, krahas asaj politike”, tha Haradinaj.

Ai e ka falënderuar kancelaren Merkel për mbështetjen e fuqishme të saj dhe të shtetit gjerman, Kryeministri Haradinaj tha se Qeveria e Kosovës me përkushtim dhe vendosmëri të lartë është duke luftuar krimin e organizuar dhe korrupsionin.

Kancelarja Angela Merkel tha se Gjermania përmes procesit të Berlinit do të luaj rolin e saj edhe më tutje që Kosova të jetë e barabartë dhe të jetë kontribuuese në stabilitetin politik jo vetëm të saj, por edhe të rajonit.

Në takimin e kryeministrit Haradinaj me Kancelaren Merkel, i pranishëm ishte edhe ministri i Jashtëm, Behgjet Pacolli.