Kompania energjetike amerikane shënon fitimin rekord prej 55.7 miliardë dollarë

Kompania energjetike amerikane Exxon Mobil ka bërë të ditur se ka përfunduar vitin 2022 me fitimin rekord neto prej 55.7 miliardë dollarë, më i madhi ky në historinë e industrisë së naftës në Perëndim.

Kjo do të thotë që kompania Exxon, vitin e kaluar ka fituar çdo orë nga 6.3 milionë dollarë, raporton Agjencia e lajmeve Reuters. Në vitin 2021, kompania kishte një neto fitim prej 23 miliardë dollarë.

Kështu, prodhimi është rritur për rreth 100.000 barel naftë dhe gaz në ditë, në 3.8 milionë barel në ditë.

Me këtë fitim, kompania Exxon ka shënuar një rekord të ri pas atij të vitit 2008 ku kishte arritur fitimin neto prej 45.2 miliardë dollarë, e çmimi i barelit ishte 142 dollarë për barel, që është 30 për qind më shumë se mesatarja e vitit 2022.

Ndryshe, të ardhurat e përgjthshme janë rritur për 44.8 për qind, në 413.68 miliardë dollarë.