Thirrje qytetarëve, Berisha: Nesër, të protestojmë përpara Parlamentit të krimit!
Kryetari i Partisë Demokratike, Sali Berisha, sot bëri thirrje nga Grupi Parlamentar për protesta që do të zhvillohen nesër para Parlamentit të krimit, i cili nuk përfill kërkesat dhe nismat ligjore të opozitës, që ka përjashtuar 23 deputetë vetëm që Edi Rama të mos hetohet për krimin që ka kryer, për korruptimin e zbuluesit kryesor të vendit partner dhe mik të Shqipërisë, dhe, në fund, për nesër kur një nga ligjet më të rëndësishme që PD ka dërguar prej muajsh, Ligji i Lustracionit, nga Edi Rama mendohet të zëvendësohet me një amendament për gjah shtrigash në Kodin Elektoral.
“Të nderuar deputetë, nesër është përsëri një seancë e parlamentit, në të cilën siç duket, pseudoshumica e skandaleve, e vjedhjeve, vazhdon bllokimin e parlamentit dhe asgjësimin, shkelmimin e të drejtave të opozitës.
I ngërthyer dhe i pashpresë në Rama-gate, apo Uotergejtin e shekullit të 21-të, Edi Rama beson dhe mendon, ose ka vendosur ta kapërcejë këtë skandal, duke paralizuar hetimin parlamentar, duke paralizuar të drejtat e deputetëve, të drejtën e fjalës.
Edhe njëherë, dua t’u bëj të qartë të gjithë qytetarëve shqiptarë, se në këtë çështje, me këtë skandal, janë dëmtuar interesat e mbarë shqiptarëve sepse afera Rama-McGonigal ishte një levë Arkimedi për konsolidimin, për fitoren e paligjshme dhe konsolidimin e pushtetit të Edi Ramës të bazuar në krimin, drogën, vjedhjen.
Shqiptarët janë dëshmitarë për të gjithë mbështetjen e jashtëzakonshme që iu dha Edi Ramës, pavarësisht nga dhunimi i zgjedhjeve, pavarësisht nga shndërrimi i vendit në një protektorat krimi, pavarësisht nga vjedhjet e shfrenuara të fondeve, buxhetit, pasurive publike të shqiptarëve.
Nuk ka dyshim se prapa kësaj mbështetje qëndronte edhe dora e zezë e Charles McGonigal, i cili i paguar nga Edi Rama, nëpërmjet Dorian Duçkës, këshilltarit të tij personal, i cili i dha 225 mijë dollarë në garazhet dhe banesën e Agron Nezës, bëri gjithçka që sipas një skenari supermafioz, duke tradhtuar vendin e tij, betimin ndaj ligjit dhe Kushtetutës, besimin e presidentit të SHBA dhe të Kongresit amerikan ndaj tij dhe u mor me shkatërrimin e opozitës shqiptare, me qëllimin e vetëm, që pagatori i tij të vazhdonte të qëndronte në pushtet dhe ta paguante më tej,” tha Sali Berisha para Grupit Parlamentar të PD, sot kur McGonigal është në burg dhe krimi i tij është i shëmtuar, por për Shqipërinë, më i rëndë është krimi i Edi Ramës.
“Kryeministër që paguan vrasës me pagesë kundër pluralizmit dhe opozitës së vendit të tij. Ky nuk është kryeministër, ky është krim-ministër. Ky krim-ministër, për t’u fshehur pas gishtit, bllokon dhe paralizon parlamentin.
Veprimtaria e Rama-gate është vetëm maja e ajsbergut. E vërteta është se në thellësinë e saj, ka krime të shumëllojta.
Dorian Duçka, këshilltari personal privat i Edi Ramës, në emër të Edi Ramës, bashkë me mafiozin Agron Neza, që u paraqitej viktimave të veta si oficer i FBI-së, kalonin nga klubi në klub, nga restoranti në restorant, duke gjuajtur ku gjenin biznesmenë, për t’i terrorizuar se jeni në lista dhe se duhet të merremi bashkë tani, për të zgjidhur problemet. Përndryshe, blacklistimi është i sigurt për ju.
Kjo veprimtari, të dashur miq, datën e fundit të saj që di unë, është 20 maj e vitit 2022.
Po kjo nuk do të thotë se pas majit nuk ka vazhduar ky gjah i turpshëm mafioz. Kjo është një ngjarje që nuk mund të kapërcehet kurrë.
Studentët e Ekuadorit u derdhën në rrugë, vetëm se një ministër i tyre doli i lidhur me dy mafiozë shqiptarë dhe kërkojnë rrëzimin e qeverisë.
A mundet ne të pranojmë që nuk bëhet fjalë për dy mafiozë dosido, por për një krim-ministër që porosit asgjësimin e opozitës te vrasës me pagesë,” tha Berisha duke përsëritur edhe me këtë rast se Edi Rama urdhëronte Etilda Gjonin, ministren e Drejtësisë, të ishte pjesë e ansamblit të McGonigal në Vjenë.
“Dosja shqiptare e Rama-gate apo Rama-McGonigal po bëhet gjithnjë e më e rëndë.
Menaxher i saj direkt është Edi Rama, për aq sa Duçka me pasaportë diplomatike dhe adresë qeveritare, ishte këshilltari personal i Edi Ramës.
Për aq sa Duçka, transportonte nga Europa në SHBA, dëshmitarë të rremë apo të vërtetë, që do dëshmonin kundër opozitës në hetimin privat që McGonigal kishte urdhëruar.
Ai arriti të angazhojë prokurorë nga Minsitria e Drejtësisë së SHBA dhe i sillte në Vjenë.
Ndërkohë Rama, urdhëronte Etilda Gjonin, ministren e Drejtësisë, të ishte pjesë e këtij ansambli në Vjenë.
Prandaj Rama ka frikë dhe tmerr nga hetimi, prandaj gënjen kur thotë se nuk ka qenë. I them se ka qenë dhe me asgjë nuk e fsheh dot këtë.”
Por çfarë e shtynte zonjën Yuri Kim të bëhet ndjekëse e Dorian Duçkës, këtij mafiozi ndërkombëtar të rrezikshëm, shprehet kryedemokrati para Grupit Parlamentar:
“Në një artikull të një ish-oficeri të CIA-s, thuhet se gjobat shkojnë 30 milionë euro. Nuk dihet sa mori Rama, Olsi, Neza, Duçka, këto duan hetim dhe vetëm hetim.
Habia shumë e madhe është se çfarë i shurdhoi dhe i verboi nga 2017-a deri në maj, se është data e fundit që di unë, sytë dhe veshët në Tiranë, të atyre që kishin për detyrë ta zbulonin, të informonin, ta denonconin.
Kjo duhet të jetë objekt i një hetimi të thellë.
Çfarë e shtynte zonjën Yuri Kim të bëhet ndjekëse e Dorian Duçkës, këtij mafiozi ndërkombëtar të rrezikshëm.
Unë mendoj se ajo duhet ta shpjegojë këtë, pavarësisht se ka një komision hetimor, por sikundër Neza që u thoshte se jam oficer i FBI, edhe Duçka u tregonte follousat e vet, për të rritur kredencialet,” tha lideri i opozitës duke i bërë thirrje inspektorit të përgjithshëm të DASH, komisionit të Kongresit të SHBA-ve dhe vetë FBI-së të hetojë me hollësi këto akte dhe veprime.
“A ka implikim, a ka lidhje, lista që Lulzim Basha dorëzoi për biznesmenët që gjoja mbështesnin foltoren, se absolutisht asnjë prej tyre nuk kishte dhënë asnjë qindarkë, dhe pastaj thirrja e tyre një nga një nga zonja Kim.
A ishte kjo një praktikë për t’i cucar drejt grupit gjobëvënës?
Ndaj i bëj thirrje inspektorit të përgjithshëm të DASH, komisionit të Kongresit të SHBA dhe vetë FBI-së të hetojë me hollësi këto akte dhe veprime.
Një gjë është e sigurt, që McGonigal, Mark Rossini, Neza, Duçka nuk operuan në ishullin e Robinson Kruzosë. Ata ishin në një vend ku kryqëzohen shumë rryma e shërbime. Si mundi të vazhdojë veprimtaria e paturbuar për 5 vite me radhë?
Me ç’mënyrë mbyllën veshët e atyre që duhet t’i shihnin? Helidoni thonë se është viktimë se i pa. Ai duhet të flasë dhe të deponojë. Po të dojë edhe në Kongres të shkojë.
Nëse është kjo, ai meriton një vlerësim. Nëse nuk është kjo, prapë mbetet enigmë.
Nuk e bëri Gennaro këtë, e bëri kryeministri i sShqipërisë, e bëri kryezbuluesi i FBI, kjo tejkalon edhe imagjinatën hollividuane.
Edi Rama nuk mund t’i shpëtojë kësaj kurrë. Prapa diellit të shkojë, ai do u thotë shqiptarëve gjithçka për këtë.
I bëj thirrje Parlamentit Europian dhe Këshillit të Europës të ndërhyjnë me urgjencë, të krijojnë komisione hetimore. Kjo sepse Duçka ka marrë peng edhe zyrtarë të lartë në vendet evropiane.
Prandaj duhet të ndërmarrë një hetim të plotë se çfarë solli kjo. Kjo solli përdorimin e korrupsionit ndërkombëtar për të goditur antikorrupsionin në Shqipëri, për të goditur opozitën në Shqipëri.”
Në fund, Kryetari i Partisë Demokratik i bëri thirrje qytetarëve që nesër të protestojnë përpara Parlamentit të krimit:
“Ndaj dhe nesër ju bëj thirrje qytetarëve të që protestojmë me fuqinë më të madhe përpara parlamentit.
Ky është parlament i krimit.
Sikundër deputetët tanë do të bëjnë një përpjekje të jashtëzakonshme për arritjen e qëllimeve të tyre.
Para botës ka një parlament të vetëm që ka përjashtuar 23 deputetë vetëm që Edi Rama të mos hetohet për krimin që ka kryer, për korruptimin e zbuluesit kryesor të vendit partner dhe mik të Shqipërisë.
Dorian Duçka është i implikuar në afera të spektrit më të gjerë.
Ka SPAK, ka drejtësi këtu, ka hetim? Nuk ekzistojnë. Kur deklarova në fillim që McGonigal ka takuar dhe ka drekuar me eksponentë të SPAK, bënë një seri deklaratash që nuk është e vërtetë.
Çfarë është e vërtetë? Që Duçka, McGonigal dhe Neza kanë vendosur gjoba milionëshe? Nuk është e vërtetë që ka ndërhyrë në veting?,” tha Sali Berisha duke moso harruar të theksoj se në seancën e nesërme Edi Rama dhe Taulant Balla duan që ta zëvendësojnë ligjin e Lustracionit me një amendament për gjah shtrigash në Kodin Elektoral:
“Nesër ne vazhdojmë betejën tonë, ne informojmë qytetarët tanë se janë 40 nisma legjislative të opozitës, të cilat Linda e parlamentit i ndryn në sirtar me urdhër të Edit të qeverisë. Ky është asgjësimi de facto i fuqisë legjislative të opozitës.
Një nga ligjet më të rëndësishme që kemi dërguar prej muajsh është ligji i Lustracionit, por këtë ligj, i cili është i standardeve ndërkombëtare më të mira, Edi Rama dhe Taulant Balla duan ta zëvendësojnë me një amendament për gjah shtrigash në Kodin Elektoral.
Në kombinim apo jo me Alibashën, nuk e di, por ai që nisi si amendament i Alibashës, përfundoi si amendament i Ballës.
Por kjo është histori turpi. Një shtet serioz, një proces serioz siç është lustracioni, e bazon në ligj të veçantë, si të gjitha vendet ish-komuniste.
Ai nuk mund të përdoret për gjah siç po përdoret nga Edi Rama. Në nenin respektiv të këtij ligji, parashikohet humbja e të drejtës për kandidim në organet e zgjedhura, në postet e rëndësishme për të gjithë informantët, bashkëpunëtorët e Sigurimit të Shtetit, për të gjithë oficerët dhe për nomenklaturën,” tha Kryetari i Partisë Demokratike, Sali Berisha, duke përfunduar:
“Prandaj qytetarë dhe qytetare, nesër në ora 10, duhet të jemi të gjithë para parlamentit për të bërë që zëri ynë të dëgjohet, që revolucioni të vazhdojë fuqishëm deri në fitoren e tij.”
