Ambasadori i Italisë mbylli sytë para dhunë së Edi Ramës, ka kritika vetëm për opozitën
Fabrizio Bucci nuk është Ambasadori i parë i Italisë që jep këshilla për opozitën se duhet të jetë e fortë dhe e bashkuar dhe që në parlament të bëjë një opozitë serioze mbi gjëra konkrete, por është padyshim ambasadori i parë italian që vetëm opozitën e sheh të dhunshme dhe në kaos ndërsa mbyll sytë para veprimeve të mazhorancës, që për katër vitet të cilat foli në Shkodër, më shumë ishin kriminale se sa kaotike!
“Gjëja e parë është që duhet të ulim tonet, sepse tonet që i drejtohen dhunës, revoltës, nuk mendoj se i bëjmë mirë vendit. Mendoj se qytetarët e këtij vendi kanë nevojë për një vend normal, për politikanë normalë, të cilët kujdesen për nevojat e qytetarëve, e nevojat e qytetarëve janë shërbimet publike, shkolla të reja, hapësira të reja, kjo është ajo çfarë kanë nevoje njerëzit nga politika e të gjithë kaheve politike, mazhoranca apo opozita.
Gjëja e dytë që kam evidentuar me grupin e miqësisë parlamentare mes Shqipërisë dhe Italisë, ka qenë një tjetër këndvështrim në atë mbrëmje, një shpirt ndoshta edhe italian, ku të gjithë së bashku po diskutonin larg zhurmës dhe debateve brutale, por me një shpirt të butë për të mirën e njerëzve për nevojat e kombit, dhe është ajo fryma që i duhet vendit,” tha Ambasadori Bucci dhe sikur të mos ishte me zë e figurë do kishte dyshime se po flet Taulant Balla.
Por, jo, Ambasadori i Italisë, opozitës e cila firmosi çdo marrëveshje me BE deri më sot, i dha edhe leksione integruese.
“Pak kohë më parë Shqipëria ka hedhur një hap të rëndësishëm drejt BE, dhe hyrja e Shqipërisë në familjen e madhe europiane nuk është objektiv i vetëm një krahu politik, është objektiv politik i të gjithëve, dhe mua më pëlqen që të gjithë të punojnë në këtë drejtim, pa diskutim që mund të ketë mendime apo ide të ndryshme por në demokraci mazhoranca është ajo që qeveris dhe janë zgjedhësit ato që vendosin kush qeverisë, çdo dy vite, çdo vit, 1 herë në katër vite për qeverinë, 1 herë në 4 vite për zgjedhje lokale, ai është momenti kur qytetarët shprehen.
Në këto 4 vite mua do të më pëlqente që politikanët të zgjidhnin formën e civilizimit dhe dialogut që nuk është gjithmonë përballje mes akuzave, dhunës verbale, e të shpresojmë që të mos ketë dhunë të asnjë forme tjetër,” tha Ambasadori italian i cili heshti për çdo akt korrupsioni dhe vepër kriminale që të paktën ndërlidhet me shtetin e Italisë, dhe sot i ndërsehet vetëm opozitës.
Ndërkohë foli dhe për zgjedhjet e 14 Majit, ndërsa duke mos respektuar as Kryetarin e Bashkisë, Shkodër, Bardh Spahia, që kishte në krah dhe vjen nga opozita, dhe çdo sekondë përballet me dhunë dhe shpërfillje shtetërore, Ambasadori Bucci tha se opozita duhet të mbush boshllëkun dhe të mos përcjell gjuhën e dhunës.
“Zgjedhjet e 14 Majit janë zgjedhje të rëndësishme pasi zgjedhin drejtuesit e 61 bashkive. Do të doja që me 14 maj politikanët të mundohen që t’i ofrojnë zgjidhje qytetarëve. Do të dëshiroja që me 14 maj, politikanët të ofrojnë alternativa për banorët.
Qëndrimi im është që edhe opozita të mbushë boshllëkun e krijuar, sepse në demokraci një mazhorancë ka nevojë për një opozite, opozita është e fortë nëse është e bashkuar, por këshilla ime si përfaqësues i Italisë, është që opozita duhet te jetë e fortë dhe e bashkuar që në parlament të bëjë një opozitë serioze mbi gjëra konkrete dhe jo vetëm kaos, kjo nuk i shërben askujt, as mazhorancës.”
Ndryshe, nuk dihet se cili ishte qëllimi i vizitës së Ambasadorit Fabrizio Bucci, në Shkodër dhe takimi i tij me Kryetarin e Bashkisë, por, gjuha që përdori ai në qytetin më të dashur shqiptar ndaj Italisë, më shumë i ngjante një gjuhe të Ambasadorit të Serbisë kur viziton Vrakën!
