Takimi Thaçi-Vuçiç më 18 korrik në Bruksel

Presidenti I Kosovës, Hashim Thaçi dhe ai i Serbisë, Aleksandar Vuçiç do të takohen më 18 korrik në Bruksel me shefen e diplomacisë evropiane, Federica Mogherini, bënë të ditur e përditshmja serbe “Blic”.

Ky vendim vjen pas konfirmimit të Shefit të ekipit negociator të Kosovës për dialogun, Avni Arifi, se pala serbe ka anuluar pjesëmarrjen në këtë takim tre palësh. “Anulimi i takimit është edhe një dëshmi e radhës dhe dëshmon se Serbia me çdo kusht po insiston të bllokojë zbatimin e marrëveshjes së Brukselit për energji,” tha dje Arifi për mediat kosovare duke shtuar se nuk e dinte arsyen e  refuzimit të këtij takimi nga pala serbe, por pala serbe vazhdon të jetë destruktive në dialog.

Takimi i fundit zyrtar i dy liderëve u zhvillua më 15 qershor në Bruksel. Dhe vazhdimi i dialogut Kosovë-Serbi pas një kohe kaq të shkurt, nga mediat serbe konsiderohet si intensifikim i procesit.

Ndryshe, sipas burimeve, Federica Mogherini në takim me Thaçin dhe Vuçiçin do të shqyrtoj përparimin e bisedimeve mbi Marrëveshjen e normalizimit të marrëdhënieve, si dhe planin në lidhje me hapat dhe takimet e ardhshme.