“Libri i punëve të mira”, Berisha: PD, gardiane e vokacionit perëndimor të Shqipërisë

“Libri i punëve të mira të PD” është një dëshmi se Partia Demokratike është një lokomotivë e reformave të tregut, është një lokomotivë e proceseve integruese dhe një gardiane e vokacionit perëndimor të vendit, tha Kryetari i PD, Sali Berisha, para Departamentit Brain Gain ku u prezantua dhe udhërrëfyesi për demokratët dhe qytetarët shqiptarë.

“PD ka një trashëgimi me suksese dhe të metat e veta. Por ka një trashëgimi të jashtëzakonshme, pasi ajo mori vendin më të varfëruar të Europës dhe një nga tre vendet më të varfra në botë, dhe e nxori në grupin e vendeve me të ardhura të mesme të larta, çka përbënte arritje epokale të këtij vendi. E anëtarësoi në NATO dhe arritje të tjera,” tha Sali Berisha duke e vlerësuar “Librin e punëve të mira të PD” si një libër jashtëzakonisht të çmuar.

“Është një libër që përveçse do shpërndahet, do publikohet në faqen e PD. Është një libër që frymëzon demokratët për një të ardhme edhe më të mirë edhe se kjo, për suksese edhe më të mëdha se këto që ka realizuar.

Është një dëshmi se PD është një lokomotivë e reformave të tregut, është një lokomotivë e proceseve integruese dhe një gardiane e vokacionit perëndimor të vendit.”

Kur është fjala te dëshmitë dhe udhërrëfyesi për demokratët dhe qytetarët shqiptarë, në prag të këtyre zgjedhjeve, Kryetari i Partisë Demokratike thotë:

“Këto 10 vite, po t’i karakterizojmë në rrafshin filozofik, kanë qenë vite të një kohe të ndaluar, në kuptimin që progresi, zhvillimi i Shqipërisë, avancimi i këtij procesi që është jetik për Shqipërinë, u ngadalësua në mënyrë të jashtëzakonshme, njohu edhe prapa-kthehu,” tha Kryetari i Partisë Demokratike, Sali Berisha duke përfunduar:

“Shqipëria, që në vitin 2013 ishte vendi me rrogat më të larta në rajon, u katandis sërish në vendin më të varfër me rrogat më të ulëta në rajon me vetëm 20 përqind të qytetarëve të saj që marrin ndihmë ekonomike dhe janë në nevojë për ndihmë ekonomike.”