Qeveria e Kosovës u premton komunave 200 milionë euro më shumë për vitin 2024

Buxheti i përgjithshëm i komunave të Kosovës do të arrijë vlerën 742 milionë euro. Sipas Qeverisë 200 milionë euro më shumë do të jenë për komuna gjatë kësaj qeverie, sesa në qeverisjet e kaluara.

Kryeministri i Kosovës, Albin Kurti gjatë takimit me kryetarët e komunave, diskutuan për nivelin lokal dhe për iniciativat e Qeverisë ndërsa ai u shpreh se për herë të parë në takim po marrin pjesë edhe kryetarët e komunave veriore, teksa shtoi se në këto takime ka më së shumti përfaqësues të qytetarëve.

“Takimet koordinuese të nivelit qendror dhe atij lokal janë takimet ku ka më së shumti përfaqësues të qytetarëve, e rrjedhimisht edhe temat që trajtohen janë të dobishme dhe kanë në fokus përmirësimin e jetës së qytetarëve,” tha Kryeministri duke shtuar se lajm i mirë është se buxheti për komuna për vitin 2024 është rritur.

“Buxheti i përgjithshëm komunal arrin vlerën 742 milionë euro, 200 milionë euro më shumë për komuna gjatë kësaj qeverie, sesa në qeverisjet e kaluara”.

Qeverisja lokale, tha ai, e ka vëmendjen e nivelit qendror por edhe financat që pritet të konkretizohen mes bashkëpunimit të tyre.

Kurse, kryetari Asociacionit të Komunave të Kosovë, AKK, njëherësh kryetar i Ferizajt, Agim Aliu, i ka kërkuar kryeministrit Albin Kurti që të hyrat vetjake dhe fondet e pashpenzuara t’iu barten komunave, pasi sipas tij, kjo është në përputhje me ligjet.

Aliu sot në takim me kryeministrin Kurti, deklaroi se projektet e komunës i kanë paraqitur si bartje buxhetore, derisa përmendi edhe mungesën e pronave komunale si sfidë të institucioneve lokale.

“Shprehim falënderimin për përgjigjen tuaj pozitive për ftesën tonë për takim. Komunat përmes Asociacionit të Komunave të Kosovës (AKK) vazhdueshëm i kanë paraqitur shqetësimet e tyre në formë zyrtare. Nisur që nga çështja e tatimit në pronë, e falja e 100 eurove, komunat janë gjendur në një situatë të pakëndshme para qytetarëve. Kryetarët e komunave të Kosovës kundërshtojnë bartjen e faljes së tatimit në pronë te komunat”.

Aliu, gjithashtu ka kërkuar që të themelohet grandi i katër që do të bëjë barazi tek komunat.

Ai kërkojë që komunave të i kthehen pronat nga AKP-ja dhe të mos lejohen zonat ekonomike te komunave të kalojnë në zona të qeverisë por te mbesin nën menaxhimin e komunave.

Të pranishëm në këtë takim mes Kryeministrit dhe kryetarëve të komunave ishin dhe kryetarët e porsazgjedhur në komunat veriore./Monitor/