Situatë e qetë në veri, protestat serbe vazhdojnë

Mëngjesi i sotëm duket i qetë në tre komunat veriore të banuara me shumicë serbe ndonëse edhe për sot janë paralajmëruar protesta në Zveçan, Leposaviç dhe Zubin Potok.

Një numër i madh i qytetarëve serbë janë mbledhur para objektit të Komunës së Zveçanit, trupat e KFOR-it dhe Policinë e Kosovës janë të vendosura para objekteve të tre komunave, por aktualisht situata është e qetë ndërkohë në mesin e të pranishmëve janë shfaqur edhe liderët e Listës Srpska, Goran Rakiç dhe Igor Simiq.

Ndërkaq protesuesit janë mbledhur edhe në Zubin Potok, dhe për momentin edhe aty situata është e qetë.

Serbët me mendjen e Vuçiçit në veri

Nga përleshja e djeshme me protestuesit e dhunshëm serbë, të cilët hodhën shok bomba dhe molotov, lënduan 25 ushtarë të KFOR-it disa prej të cilëve në gjendje të rëndë, derisa të lënduar pati edhe nga radhët e protestuesve.

Edhe pse në këto grumbullime ka edhe protestues paqësorë, pas dhunës serbe ndaj pjesëtarëve të KFOR-it, Kryeministri Albin Kurti vlerësoi se këto nuk janë protesta paqësore, por turma ekstremistësh të dirigjuara nga Beogradi zyrtar.

“Grafitet nacionaliste shoviniste serbe dhe aso pro-kremlinit me ekstremistë të maskuar, që targetojnë, vandalizojnë dhe sulmojnë çdo gjë jo-serbe, është treguesi kryesor i motiveve prapa veprimeve të dhunshme, e të cilat duhet të dënohen ashpër nga të gjithë,” tha Kryeministri i Kosovës.