KQZ zyrtarizon Erion Veliajn, Berisha: 15% e votuesve të Tiranës ishin shëtitës!
Sot kur KQZ i dha mandatin e dal nga zgjedhjet e 14 Majit, Kryetarit të Bashkisë Tiranë, Erion Veliaj, Kryetari i Partisë Demokratike, Sali Berisha ka denoncuar manipulimet zgjedhore me votues shetitës ku, sipas PD, vetëm në Tiranë ishin 15 për qind.
Në konferencën e përjavshme, sot, përveç Tiranës, Kryetari i Partisë Demokratike ka sjellë dëshmi të manipulimit zgjedhor më 14 Maj edhe në Kamzë e Elbasan.
“Më parë u kam njohur ju dhe kam denoncuar publikisht mbi gjysmë milionë zgjedhës shëtitës fantazmë, të cilët po i veçojmë rreth pas rrethi.
Mund t’u them se, ju informoj se në rrethin e Tiranës, në Bashkinë e Tiranës, me një total prej 697 mijë votuesish, 102 mijë prej tyre janë votues shëtitës apo 15 përqind e votuesve të Tiranës.
Pra, Tirana ka 1 të pestën e votuesve shëtitës, votues të cilët potencialisht kanë votuar më shumë se njëherë, ose janë dënuar me mosvotim.
E para është shumë më e mundshme sepse një investigim pilot i bërë nga emisioni investigativ Piranjat, gjeti siç e dini, drejtori i Erion Veliajt, kishte regjistruar në katër apartamente bosh, nga katër zgjedhës në çdo apartament apo pesë. Pra gjithsej i kishte mbushur me banorë që nuk ekzistonin, përkundrazi zgjedhës të sjellë nga zona të tjera pasi kanë votuar atje, për të hedhur votën për Erion Veliajn.
Ky hetim po vazhdon dhe do të vazhdojë rreth për rreth, qendër për qendër, ne do bëjmë publike të gjithë këtë mekanizëm gjigant, shtesë manipulative të farsës elektorale maj 2023,” tha Sali Berisha duke folur dhe për farsën zgjedhore në Kamzë ku, sipas tij, vetëm në 6 qendra janë gjetur 240 ndërhyrje manipulative.
“Por sot në këtë konferencë, do paraqesim rezultatet e para të shqyrtimit të veprimtarisë elektorale në 6 qendra votimi në Kamëz kundrejt 133 qendrave që ka kjo bashki.
Kandidati ynë ka aplikuar dhe kërkon të marrë të gjitha videot e qendrave të votimit për të vërtetuar fenomenet antikushtetuese të votimit në Bashkinë e Kamzës.
Në këto gjashtë qendra, janë gjetur 240 ndërhyrje manipulative në të cilat rasti i operatorit Haxhi Gusja, voton vetë me disa karta identiteti në qendrën e votimit 1577/1 në Valias.
Rasti i komisioneres së PS, Ilva Marku, e cila ngrihet dhe voton për votuesit. Kjo është një militante e thekur, një kriminele elektorale në qendrën e votimit.
Raste të tjera ku voton një person për 3 votues. Pra, kemi një seri videosh që do ua demonstrojmë, por ndërkohë edhe do ua nisim në emailet tuaja,” tha lideri i opozitës duke folur për praktika kriminale zgjedhore edhe në Elbasan, ku asgjë nuk qëndron në rezultatin e zgjedhjeve ndërsa përfundoi:
“Ne po bëjmë çdo gjë për t’u paraqitur shqiptarëve kriminalizimin e plotë të farsës elektorale 2023.
Të dhënat tona të tjera flasin se në Elbasan është përdorur gjerësisht kjo praktikë kriminale dhe asgjë nuk qëndron në rezultatin e këtyre zgjedhjeve.
Por ne vazhdojmë shqyrtimin e të gjitha materialeve.
Këto donim të paraqisnim sot në hyrje të bisedës sonë.”
