Albin Kurti: Serbia është përgjegjëse për gjenocidin në Srebrenicë

Serbia është përgjegjëse për gjenocidin në Srebrenicë, tha Kryeministri Albin Kurti, në ceremoninë përkujtimore me rastin e 28 vjetorit të gjenocidit në  Srebrenicë ndërsa foli për kontributin  e Kosovës në mbështetje të Bosnje Hercegovinës, nëpërmjet rezolutave dhe hapave të tjera me kapacitetet shtetërore që ka.

“Duke kujtuar gjenocidin e tmerrshëm pashmangshëm na kujtohet Mlladiçi, ‘Skorpionët’, ideologjia çetnike që u përdor nga Serbia në fillim në Kroaci e Bosnje e më pas edhe në Kosovë,” tha Kryeministri Albin Kurti në ceremoninë përkujtimore të gjenocidit në Srebrenicë, ku u vranë e masakruan mbi 8000 burra, gra, djem, boshnjakë.

Duke theksuar se na mundon fakti që kriminelët ende nuk e morën dënimin e merituar, AlbinKurti foli dhe për ndihmën që Serbia u ka dhënë serbëve të Bosnjes, si në aspektin ushtarak ashtu dhe fushat tjera.

Ndërsa foli për përgjegjësinë që ka Serbia për këtë gjenocid, Kryeministri i Kosovës kujtoi ndëshkimet e disa prej përgjegjësve të gjenocidit në Bosnje, si: Stanishiç, Karaxhiç, Mlladiç etj.

“Ky është treguesi se gjenocidi në Bosnje nuk ka ndodhur nga brenda, por nga jashtë,” tha Kryeministri Kurti duke shtuar se përgjegjës nuk janë vetëm disa serbë të Bosnjes, por Serbia si shtet, ndërsa përfundoi:

“Ne duam paqe, bashkëpunim e barazi mes shteteve e popujve në Ballkan, por themeli i kësaj paqeje është ndëshkimi i kriminelëve.”