Kërkoi vendosjen e sanksioneve kundër Rusisë, shkarkohet ministri i Ekonomisë i Serbisë

Parlamenti i Serbisë ka votuar sot për shkarkimin e ministrit të Ekonomisë, Radeta Basta.

Si ministër në Qeverinë e Serbisë, raporton RFE, Radeta Basta ka kërkuar vendosjen e sanksioneve ndaj Rusisë, duke deklaruar se shteti serb po paguan çmim të lartë duke mos vendosur sanksione ndaj Moskës.

Ndryshe, Serbia është një nga shtetet e pakta në Evropë që ende nuk ka sanksionuar Rusinë për shkak të pushtimit të Ukrainës.

Në fund të qershorit, kryeministrja serbe, Ana Brnabiç, i propozoi Parlamentit që të shkarkojë ministrin Basta.

Radeta Basta u zgjodh ministër i Ekonomisë si pjesëtar i koalicionit të Partisë Socialiste të Serbisë, lider i të cilës është ministri i Jashtëm, Ivica Daçiç. Në këtë koalicion bën pjesë edhe partia Serbia e Bashkuar.

Më 20 qershor, Radeta Basta njoftoi se kishte regjistruar lëvizjen Rruga Evropiane, PEP, dhe tha se shumë shpejt kjo lëvizje do të shndërrohet në parti dhe do të garojë në zgjedhjet në të gjitha nivelet.

Po të njëjtën ditë, raporton RFE, lideri i Serbisë së Bashkuar, Dragan Markoviç Palma tha se Radeta Bastës i është dhënë një afat që të japë dorëheqje nga të gjitha pozitat partiake. Ai tha se kërkesa për shkarkimin e Bastës po ashtu është dërguar në Qeveri.