Samiti i OGP, Kurti: Në Kosovë aleatët e Rusisë kanë tendenca për sulme kibernetike

Kryeministri i Kosovës, Albin Kurti, akuzoi aleatët e Rusisë se përmes dezinformimit dhe sjelljeve të tjera dashakeqe në fushën kibernetike, po ndikojnë në procesin e normalizimit të raporteve mes Kosovës dhe Serbisë.

Në fjalën e tij që mbajti në Samitin e “Open Government Partnership” në Talin të Estonisë, Albin Kurti tha se këto veprime në Kosovë janë duke u intensifikuar.

“Në Kosovë, përpjekjet nga aleatët e Rusisë për të shtrembëruar të vërtetë, të kaluarën dhe të tashmen, janë të dukshme dhe po intensifikohen. Gjatë kohës së ndjeshme, kur shteti ynë është i përkushtuar në procesin e ndërmjetësuar nga Bashkimi Evropian dhe Shtetet e Bashkuara për të normalizuar raportet me fqinjin tonë verior, Serbinë, por edhe për përfshirjen e plotë të minoriteteve në proceset demokratike të shtetit, pa ndikim nga jashtë, këto kërcënime kibernetike, sikurse dezinformimi, bullizimi kibernetik dhe forma të tjera janë veçmas përcaktuese,” tha Kryeministri i Kosovës, dhe në dritën e sulmeve kibernetike, digjitalizimi bëhet edhe më i rëndësishëm.

“Me internetin qe shtrihet në gjithë territorin e Kosovës, qytetarët tanë kane mundësi në marketin ndërkombëtar. Kështu mund ta përmirësojmë efikasitetin e shëndetësisë, gjyqësorit dhe ta rrisim produktivitetin e gjithë ekonomisë. Mirëpo çdo e mirë, ka edhe kërcënimet e saj. Në Kosovë, aleatët e Rusisë kanë tëndenca të bëjnë sulme kibernetike. Jemi të hapur të mësojmë nga ju për një demokraci sa më të fortë digjitale,” tha Kryeministri i Kosov, Albin Kurti duke përmendur në fund se në dy vitet e fundit janë digjitalizuar mbi 150 shërbime, duke përmendur dhe portalin e-kosova.

Ndryshe, Samiti Global i 8-të i Open Government Partnership këtë vit organizohet nga Qeveria e Estonisë.