Grupi Parlamentar i PD, Berisha: U diskutua e gjithë agjenda e nesërme e parlamentit
Në përfundim të mbledhjes së Grupit Parlamentar të PD pa deputetët e Bashës, Kryetari i PD, Sali Berisha, tha se u diskutua e gjithë agjenda e nesërme e parlamentit ndërsa kreu i Grupit, Gazment Bardhi, bëri të ditur vendimet e miratuara në këtë mbledhje, një ditë para seancës plenare
“U diskutua e gjithë agjenda e nesërme e parlamentit. Qendrimet që do mbajnë deputetët dhe z.Bardhi do t’ju informojë më me hollësi.
U diskutua gjerësisht mbi drejtimin absolutisht disfunksionial në kundërshti me ligjin, me Kushtetutën të Parlamentit. Shkelmimin nga ana e institucioneve të vendit të të drejtave elementare të deputetëve për t’u informuar dhe informuar zgjedhësit e tyre.
Braktisjen që i bën Edi Rama Parlamentit.
Për të gjitha këto grupi parlamentar, deputetët e opozitës do të japin përgjigjet e merituara. Faleminderit!”
Ndërsa duke sqaruar qëndrimet që do mbajnë deputetët, Gazment Bardhi, bëri të ditur vendimet që mori Grupi Parlamentar i PD:
“Kemi marrë disa vendim. Së pari vendosëm të propozojmë një paketë ligjore për të nisur punën për rritjen e pensioneve, ndihmës ekonomike, minimumi jetik. Sa i takon llogaridhënies së qeverisë, do të ketë seanca dëgjimore në Komisione për çështje me interes për publikun. Kemi unifikuar të gjitha qëndrimet për rëndin e ditës në seancën e radhës.”
Ndryshe, gurë prove për funksionimin e këtij grupi të bashkuar të Partisë Demokratike është seanca e nesërme plenare ku si Pikë e 12. e Rendit ditës është Projektligj “Për disa shtesa dhe ndryshime në ligjin nr. 8577, datë 10.2.2000, “Për organizimin dhe funksionimin e Gjykatës Kushtetuese të Republikës së Shqipërisë, të ndryshuar, i cili nuk u mbështetë në Komisionin e Ligjeve nga opozita, dhe për miratimin e të cilit në seancë plenare duhen 84 vota, që Edi Rama nuk i ka, pa votat e deputetëve që mbështesin Lulzim Bashën.
