Hovenier: Normalizimi i marrëdhënieve Kosovë-Serbi interes i gjithë rajonit

Ambasadori i Shteteve të Bashkuara në Prishtinë, Jeff Hovenier, në edicionin e dytë të Samitit të Paqes dhe Demokracisë tha se dialogu është e vetmja mënyrë për marrëdheniet Kosovë – Serbi, ndërsa theksoi se SHBA ka mbështetjen e plotë ndaj përfaqësimit të dialogut nga Bashkimi Evropian.

Të gjithë, tha ambasadori amerikan, po punojnë për të ardhmen stabël të Kosovës dhe Serbisë, dhe, normalizimi i marrëdhënieve mes dy shteteve është interes jo vetëm i dy vendeve, por i gjithë rajonit.

“SHBA ka besimin e plotë të ndërmjetësimit të dialogut nga BE, të përfaqësuar nga Borell dhe Lajçak si zbatuesit e kësaj politike. Është e rëndësishme për të gjithë akterët e përfshirë në këtë proces që ta kuptojnë procesin në të cilën ndodhen dhe të luajnë ‘poker’ me kartat të cilat iu ofrohen,” u shpreh Hovenier i bindur se vetëm dialogu mund të sjellë paqe në vend.

“Nuk është sekret që Shtetet e Bashkuara të Amerikës dhe partnerët  e shohin dialogun e udhëhequr nga BE si mundësinë më të mirë dhe të vetme për zhvillimin e integrimit të plotë në Bashkimin Evropian dhe sigurimin e paqes dhe prosperitetit në rajon.”

Lidhur me raportin e Kosovës drejt rrugëtimit evropian, Jeff Hovenier tha se duan ta shohin si pjesë të Bashkimit Evropian dhe strukturave tjera ndërkombëtare.

“Duam të shohim Kosovën që po e merr të drejtën e saj të plotë në Bashkimin Evropian, duke u njohur nga gjithë komuniteti ndërkombëtar për atë që është, një shtet i pavarur dhe sovran. Kjo nuk është e kontestueshme,” tha Ambasadori i SHBA në Prishtinë, Jeff Hovenier, duke përfunduar:

“Ne duam ta shohim Kosovën pjesë të këtyre institucioneve, pjesë të BE-së dhe pjesë të NATO-s.”