I organizuar në mënyrë profesionale ushtarake,  Hovenier: Sulmi, kërcënim për Kosovën!

Sulmet në veri kanë qenë të organizuara në mënyrë profesionale ushtarake dhe prapa tyre qëndron dikush që i ka trajnuar dhe pajisur me armatim, tha Ambasadori i SHBA në Prishtinë, Jeffrey Hovenier, pas takimit me Presidenten Vjosa Osmani, duke shtuar se qëndron përkrah popullit të Kosovës.

“Nuk ishte një grup i qytetarëve individual që kanë ardhur së bashku për të shprehur brengat. Është një grup i trajnuar dhe i organizuar dhe dikush qëndron prapa tyre që i ka trajnuar dhe pajisur me armatim të rëndë,” tha Ambasadori Hovenier duke i cilësuar si sulme kriminale, por nuk tha nëse paraprakisht ishin njoftuara se do të ndodhin.

“Nuk e di për pjesën e kriminelëve në Manastir që përpiqen të negociojnë me dikë. Jam në dijeni për raportet që ka pasur të shtëna nga Manastiri kundër forcave policore të Kosovës. Ky ishte një sulm i rëndë kriminal,” tha Ambasadori i SHBA në Prishtinë duke çmuar koordinimin e autoriteteve policore të Kosovës me strukturat ndërkombëtare ndërsa përfundoi:

“Së pari kam qenë në kontakt me KFOR-in, EULEX-in dhe autoritetet policore. Ka qenë një koordinim i fortë ndërmjet Policisë së Kosovës dhe përfaqësuesve tjerë. Kemi qenë të shqetësuar për këtë sulm pa arsye ndaj Policisë së Kosovës.”