Armand Duka zgjidhet Zv/President i UEFA-s

Presidenti i Federatës Shqiptare të Futbollit, Armand Duka, sot është zgjedhur Zv/Presidenti i UEFA-s.

“Vendimi u mor sot në mbledhjen e radhës së Komitetit Ekzekutiv të UEFA-s, që zgjodhi pikërisht Presidentin Duka me votim unanim në postin e numrit dy të qeverisë së futbollit europian. Një vendim që vjen natyrshëm duke parë kontributin e madh ndër vite të Presidentit të FSHF-së dhe eksperiencën e tij të vyer në menaxhimin e futbollit tashmë edhe në Europë,” thuhet në njoftimin e FSHF-së duke e vlerësuar si një votëbesim të rëndësishëm për numrin 1 të futbollit shqiptar, që pak muaj më parë u zgjodh për herë të dytë anëtar i Komitetit Ekzekutiv të UEFA-s në Kongresin e 47-të të UEFA-s që u zhvillua në Lisbonë, Portugali.

Në këto zgjedhje, Armand Duka u rendit në vendin e parë me 45 vota nga 55 sa ishin në total, duke marrë kështu për herë të dytë besimin e delegatëve të federatave evropiane.

“Lajmi i sotëm është pa diskutim një arritje e madhe jo vetëm për futbollin shqiptar, por për të gjithë Shqipërinë,” vlerëson Federata Shqiptare e Futbollit.