Samiti i Berlinit, Berisha: Do paraqesim para audiencës evropiane, të vërtetat e Edi Ramës!

Mirëpresim Samitin por do bëjmë gjithçka për të paraqitur para audiencës së nderuar evropiane, të vërtetat e Edi Ramës dhe regjimit të tij, tha Kryetari i Partisë Demokratike, Sali Berisha, para Kryesisë së PD, duke paralajmëruar një aktivitet më 16 Tetor, ditën kur priten liderët e Procesit të Berlinit në Tiranë, me qëllim të një informimi korrekt në të gjitha nivelet, për këtë regjim që bazohet në krimin, drogën dhe vjedhjen e qytetarëve shqiptarë.

Sot, tha Kryetari i Partisë Demokratike, po përdoret brutaliteti dhe çdo mjet tjetër, për ta vënë opozitën në kontroll të plotë.

“Edi Rama shpalos çdo ditë e më shumë në Shqipëri, psikologjinë e etërve të tij xhelatë, të pushtetit pa opozitë. Edi Rama do të kontrollojë çdo gjë, të gjitha pushtetet në këtë vend. Ka krijuar atë që në gjuhën popullore quhet shpif-opozitë. Në gjuhën aktuale, fake-opozitë.

Përdor një peng të shpërfytyruar nga çdo lloj integriteti moral, politik, njerëzor, të çfarëdollojshëm, që quhet Lul Brava,” tha Sali Berisha dhe do t’ua servirë shqiptarëve këtë, si opozitarin e tij.

Ne nuk shtojmë, nuk deformojmë asnjë të dhënë siguroi lideri i opozitës duke folur para Kryesisë së Partisë Demokratike ndërsa përfundoi:

“Është Edi Rama, i cili manipulon dhe kontrollon këtu parlamentin, ekzekutivin, gjyqësorin, agjencitë e quajtura të pavarura, ekonominë, klanet e fuqishme mafioze të vendit.

Por ky debat i yni dhe kjo analiza e jona, duhet të ketë qëllim më madhor, motivimin e mbështetësve, anëtarëve, simpatizantëve tanë për fillimin sa më parë të një beteje të qëndrueshme, të një lëvizje të fuqishme popullore, që duhet të ketë synimin më madhor, largimin e Edi Ramës nga pushteti.”