Pas sulmit terrorist serb në Banjskë, Joseph: Pozita e Beogradit është dobësuar!

Pas sulmit terrorist serb në Banjskë, lëvizjet e presidentit të Serbisë, në vend që ta qetësonin situatën, krijuan një përshkallëzim të ri, thotë profesori në Universitetin “Johns Hopkins” në Washington, Edward P. Joseph, ndërsa thekson nevojën për të hetuar ngjarjet në Banjskë kujton vlerësimin e Shtëpisë së Bardhë se ai nuk ka qenë një grup i zakonshëm ad-hoc.

 “Ne e dimë tashmë se çfarë bëri presidenti Vuçiq pas 24 shtatorit, dhe po pyes nëse lëvizjet e Vuçiçit janë përshkallëzim në vend të qetësimit. Vuçiç e ka përshkallëzuar edhe më shumë situatën. Edhe Kisha Ortodokse Serbe ishte distancuar, duke shprehur ngushëllimet e saj me rastin e policit të vrarë. Por shpallja e zisë treditore, gjuhë e ashpër nxitëse ndaj Albin Kurtit në mediat serbe, dërgimi i armëve në kufirin me Kosovën, ky është një përshkallëzim i qartë i Aleksandër Vuçiçit, i cili menjëherë pas Banjskës u takua me ambasadorin rus,” tha Joseph për televizionin publik të Kosov, RTK duke shprehur besimin se pozita e Beogradit është dobësuar dhe tani i takon Washingtonit dhe Brukselit që të ushtrojnë presion më të fortë ndaj presidentit të Serbisë, Aleksandar Vuçiç.

 “Besoj se është thelbësore të përfitohet nga kjo situatë me kërcënime me sanksione dhe faktin që presidenti Vuçiç është në defansiv. E rikujtoj se BE e quajti atë një sulm terrorist. Kjo do të thotë se Vuçiç tani është në një pozitë të cenueshme. BE dhe SHBA duhet të përfitojnë nga kjo dhe t’u paraqesin palëve një dokument ‘merre ose lëre’, me zbatim të qartë, duke përfshirë hapat që duhet të ndërmarrë Beogradi, në mënyrë që zbatimi të jetë i barabartë,” tha profesori amerikan dhe njohësi i mirë i rrethanave ballkanike.

I pyetur se çfarë mund të pritet nga vizita e të dërguarve të posaçëm, Edward Joseph thotë se duhen kërkuar hapa konkretë.

 “Misioni i tyre duhet të bazohet në atë që nevojitet për të çuar gjërat përpara dhe për t’i kërkuar presidentit Vuçiç ta nënshkruajë atë, se Serbia nuk duhet ta bllokojë Kosovën, dhe të thotë se e mbështet procesin e anëtarësimit të Kosovës në BE,” shprehet profesori në Universitetin “Johns Hopkins” në Washington, Edward P. Joseph, i bindur se tani është krijuar mundësia që bashkësia ndërkombëtare të kërkojë zbatimin e plotë të asaj që është rënë dakord në dialogun Kosovë-Serbi.