Në KS OKB, Osmani: Serbia ka dashur ta shohë Kosovën sikur Krimenë!
Pas sulmit terrorist të 24 shtatorit çdo gjë ka ndryshuar, zotimi i Kosovës për ta mbrojtur sovranitetin dhe sundimin e ligjit është i palëkundshëm, tha Presidentja Vjosa Osmani në KS të OKB, duke shtuar se pikërisht në këtë ditë Serbia ishte që Kosova të bëhej si Krime, por u zunë në befasi nga përgjigja e Policisë së Kosovës.
Organizatat ndërkombëtare e paraqesin të vërtetën e jo propaganda që sapo dëgjuat nga Serbia sot duke replikuar me Kryeministres serbe Ana Brnabiç e cila asnjë fjalë të vetme nuk e tha të vërtetë as për Kosovën dhe as për veprimin e shtetit serb në Kosovë.
Në seancën e Këshillit të Sigurimit të Kombeve të Bashkuara për Kosovën e cila mbahet dy herë në vit, e para foli Përfaqësuesja Speciale e Sekretarit të Përgjithshëm të OKB, Caroline Ziadeh, e cila theksoi nevojën urgjente për veprime të bashkërenduara dhe kompromis për të trajtuar mjedisin e përkeqësuar të sigurisë dhe për të siguruar paqen dhe stabilitetin në Kosovë.
Pas sulmit në Bansjkë të Zveçanit, më 24 shtator, Ziadeh tha se situata në veri të Kosovës është serioze ndërsa dha detaje rreth asaj çfarë ndodhi në ditën kritike. “Pati shkëmbime zjarri mes Policisë së Kosovës dhe grupit të armatosur, ku për pasojë u vranë katër veta, një pjesëtar i Policisë së Kosovës dhe tre të tjerë. Gjendja e sigurisë në veri të Kosovës që nga 24 shtatori është ngritur në mënyrë të qëndrueshme.
“Është thelbësore që hetimet që po zhvillohen aktualisht të ofrojnë mundësinë për të dokumentuar me fakte këto ngjarje dhe për ti mbajtur autorët përgjegjës,” tha Ziadeh duke shpresuar që rezultati i takimeve të udhëhequra nga BE-SHBA të mbajtura veçmas në Beograd dhe Prishtinë më 21 tetor do ta rikthejnë dialogun në rrugën përpara, me angazhim të vendosur nga të dyja palët për të ndërmarrë hapa de-përshkallëzues dhe për të vepruar sipas propozimeve të paraqitura gjatë takimeve.
Brnabiç tani kërkon mbajtjen e zgjedhjeve në veri
Kryeministrja e Serbisë, Ana Brnabiç, si në Beograd ashtu dhe KS të OKB-së nuk e tha asnjë të vërtetë për Kosovën. Dhe, ashtu siç kërkoi nga serbët ti bojkotojnë zgjedhjet në veri sot kërkoi të mbahen zgjedhjet!
Edhe në KS OKB për gjithë këtë situatë akuzoi Kryeministrin Kurti, e për të qenë më e pafytyrë se sa është zakonisht, situatën në Kosovë e vlerësoi mjaft të rëndë në dy vitet e fundit.
“Në vitin e fundit, situata është bërë aq e rëndë sa duhet bërë përpjekje për ta kuptuar jo vetëm si politikanë, por si qenie njerëzore. Ku të shkojmë nga këtu, së paku për të siguruar një grimë shprese për ata që jetojnë në Kosovë, së paku një grimë shprese që stabiliteti e paqja afatgjate janë në fakt të mundshme,” tha Brnabiç duke predikuar si gjithë priftërinjtë kriminel serbë që e sollën popullin serb buzë greminës ndërsa foli dhe për kthimin e serbëve në Kosovë, që, sipas saj, janë kthyer më pak se 2 për qind.
Pasi kërkoi që të zbatohet marrëveshja për Asociacionin e Komunave me Shumicë Serbe, deri sa mohoi ndërlidhjen e ngjarjes së Banjskës me qeverinë serbe, Brnabiç kërkoi të mbahen zgjedhjen në katër komunat në veri të Kosovës sa më parë që është e mundur.
Osmani: Kosova më 24 shtator ishte shënjestër i një akti të agresionit nga Serbia
Fjalimin në KS të OKB-së, Presidentja e Kosovës, Vjosa Osmani, e filloi me të mbijetuarit e luftës në Kosovë, sidomos për viktimat e mijërave të dhunuarve gjatë luftës.
Viktimat e dhunës seksuale, sipas saj, zgjodhën jo vetëm të mbijetojnë, por edhe të përpiqen të jetojnë. Kjo është historia e Kosovës.
Ajo iu drejtua KS të OKB-së si një presidente e një vendi që ka humbur 13000 njerëz gjatë luftës në Kosovë, shumë të zhdukur dhe me vrasjen e fëmijëve që, në kokë banori, është më së shumti në çdo luftë në ish-Jugosllavi.
“Ne jemi ngritur nga zeroja për të ndërtuar jetën tonë, për ta ndërtuar një të ardhme, ku të gjithë njerëzit, pavarësisht etninë e tyre, mund të jetojnë pa frikë, pa diskriminim”, tha ajo.
Presidentja më tej shprehu zotimin e shtetit të Kosovës për të ecur përpara e jo për të shkuar prapa.
“Jam këtu për të rikonfirmuar se të gjitha institucionet e Kosovës nuk e lejojnë ecjen prapa për lirinë e mundimshme që kemi fituar bashkë me demokracitë nga mbarë bota, sepse Republika e pavarur e sovrane e Kosovës është storja më e suksesshme në historinë e njerëzimit”, deklaroi presidentja Osmani.
Duke fol për sulmin e grupit terrorist e paramilitar serbë të mbështetur nga Serbia, në Banjskë të Zveçanit, ku u vra pjesëtari i Policisë së Kosovës, Afrim Bunjaku, Osmani tha se Serbia ka dashur ta shohë Kosovën sikur Krimenë
“Atë ditë Republika e Kosovës ishte cak i një akti të agresionit nga Serbia, i grupeve terroriste e paramilitare,” tha Presidentja Osmani duke konstatuar se pas ngjarjes së 24 shtatorit çdo gjë ka ndryshuar, duke shtuar se zotimi i Kosovës për ta mbrojtur sovranitetin dhe sundimin e ligjit është i palëkundshëm.
“Serbia priste më 24 shtatori, ishte që Kosova të bëhej si Krime, por u zunë në befasi nga përgjigja e Policisë së Kosovës,” tha Presidentja Osmani duk eshtuar se Kosova dallohet për luftën ndaj korrupsionit, për lirinë e medieve, liritë politike dhe të të drejtave civile, por edhe për zgjedhjet demokratike.
“Është e qartë organizatat ndërkombëtare e paraqesin të vërtetën e jo propaganda që sapo dëgjuat nga Serbia sot!”
Si shtet me demokraci më të re në rajon, tha Osmani, Kosova ka përqafuar rrugëtimin e vet shtet-ndërtues me një dedikim të papërsëritshëm me një demokraci gjithëpërfshirëse.
“E kuptojmë plotësisht vlerën e demokracisë dhe pavarësisë sonë dhe jemi fuqimisht krenarë për gjithë rrugëtimin tonë shtet-ndërtues, rrugëtim i vendosmërisë dhe e sakrificës!”
Ambasadori i Shqipërisë në OKB mohon fjalët e Kryeministres së Serbisë
Ambasadori i Shqipërisë në OKB, Ferit Hoxha, e nisi fjalën e tij me, siç tha, lajme të mira përtej horizontit të errët, duke përmendur lirinë e lëvizjes së popullit të Kosovës në zonën Shengen.
“Liberalizmi i vizave, një proces tejet i pritur e i zgjatur janë vërtetuar që kanë fuqi transformuese kudo që janë aplikuar dhe kjo është pjesë e përafrimit me të drejtat e liritë njerëzore me të cilat Kosova ka funksionuar.”
Duke vënë në pah dallimet në diskutime nga disa folës në KS të OKB-së, Ambasadori i Shqipërisë tha se duhet vënë ngjarjet në kontekstin e duhur ndërsa përkujtoi të kaluarën e vrazhdë në të kaluarën në mes të Kosovës e Serbisë.
“Ndarja e Kosovës me Serbinë ka kaluar më të keqen: krime lufte, krime ndaj njerëzimit vrasja e civilëve, varreza masive që vazhdojnë të zbulohen edhe sot, përdhunime masive që nuk mund të harrohen,” tha Ambasadori Hoxha duke shtuar se ka qenë e nevojshme ndërhyrja ndërkombëtarë për të ndalur këto vrasje.
Duke mohuar saktësinë e fjalës së kryeministres së Serbisë, lidhur me raportet që ajo i përmendi në fjalimin e saj më parë, lidhur me Kosovën, shtoi:
“Asnjë nuk ndodhin në raportin e Sekretares së Përgjithshme, as në raportin e OSBE-së, as në raportin e EULEX-it,” tha Ambasadori i Shqipërisë, Ferid Hoxha.
SHBA dënon sulmin e 24 shtatorit në veri të Kosovës
Qeveri e SHBA-së dënon sulmin e 24 shtatorit, që për pasojë pati vrasjen e një polici të Policisë së Kosovës, tha Ambasadori i SHBA-së në OKB, Robert Wood, duke shtuar se duhet të ketë përgjegjësi të plotë në pajtim me sundimin e ligjit për autorët e krimit.
“Sulmi i 24 shtatorit ishte një akt që vuri në rrezik jetën e qytetarëve të Kosovës. Individët që janë në vendet tjera duhet të ekstradohen në Kosovë,” tha Ambasadori i Shteteve të Bashkuara duke bërë të ditur se SHBA është duke punuar ngushtë me BE-në dhe NATO-n për shtensionimin e situatës në Kosovë, ndërsa kërkoi nga palët në dialog që të përmbahen nga veprimet e njëanshme, si dhe të vazhdojnë dialogun me hapa konkret.
“SHBA vazhdon ta mbështesë dialogun e ndërmjetësuar nga BE-ja si rruga më e mirë për pajtimin mes Kosovës dhe Serbisë,” tha përfaqësuesi i SHBA-së ndërsa vlerësoi veprimin e Policisë së Kosovës për ngjarjen e 24 shtatorit, e cila kishte vepruar në bashkëpunim me EULEX-in dhe KFOR-in.
Pas fjalës së Ambasadorit të Rusisë dhe ndërhyrjes së sërishme të Kryeministrets së Serbisë, Ana Brnabiç ka reaguar Presidentja e Kosovës, Vjosa Osmani, duke theksuar se Rusia përsëri e përdori propagandën kundër atyre që luftuan për lirinë e Kosovës.
Dallimi mes Kosovë dhe Serbisë, tha ajo, është që Kosova nuk frikësohet nga drejtësia, dhe për këtë arsye është krijuar edhe Dhoma e Specializuar e Kosovës.
“Nuk duam të krijohet barazia në mes atyre që kanë bërë gjenocid dhe atyre që janë mbrojtur nga gjenocidi. Jemi të bindur se drejtësia do të mbisundojë,” tha Preisdentja Osmani duke shtuar se njerëzit e Kosovës kanë përjetuar krimin më të madh humanitar, derisa uroi që kjo mos t’i ndodhë askujt.
“Keni dëgjuar përfaqësuesin rus dhe Brnabiç duke folur për të ashtuquajturin ‘terrorin Kurti’. Kurti është kryeministër i Kosovës dhe ishte i burgosur i luftës, i torturuar deri në vdekje në burgjet e tyre, ndërsa në atë kohë presidenti i Serbisë, ishte ministër i Propagandës në regjimin e Milosheviçit,” vuri në dukje Presidentja Osmani duke u shprehur qartë në KS të OKB:
“Kosova është e përcaktuar për dialog, të ndërmjetësuar nga BE, ku, në njërën anë keni ish-ministrin e Propagandës së regjimit të Milosheviçit, e në anën tjetër, një të burgosur politik.”
