“Dita e informimit për komunitetet”, Kurti: Kosova po kontribuon për stabilitet dhe paqe në rajon!
Profesionalizmi i Akademisë së Kosovës për Siguri Publike, është i rëndësishëm për mbrojtjen e kufijve të Kosovës që mallrat që kalojnë të jenë të kontrolluara dhe kriminelët të ndëshkohen, tha Kryeministri i Kosovës, Albin Kurti, në Akademinë e Kosovës për Siguri Publike, AKSP, ku është shënuar “Dita e informimit për komunitetet” duke shtuar se nga fillimi i mandatit qeverisë janë zhvilluar mbi 1000 operacione kundër kontrabandës, janë shkatërruar 100 grupe kriminale, 16 laboratorë të drogës dhe mbi 3800 persona janë arrestuar.
“Bashkë po angazhohemi të ndërtojmë një shtet të sigurt për të mbrojtur vendin e popullin tonë. Duke qenë të besueshëm ndaj aleatëve tanë, po i kontribuojmë paqes së qëndrueshme dhe stabilitetit afatgjatë në rajonin tonë,” tha Kryeministri Kurti duke ftuar anëtarët e komuniteteve të Kosovës që të bëhen pjesë e Akademisë së Kosovës për Siguri Publike dhe të shërbejnë në institucionet e sigurisë në vend.
“Duke i vënë në funksion, talentet, shkathtësitë dhe profesionalizmin nga të gjithë qytetarët pa dallim, institucionet e sigurisë do të arrijnë më të mirën në shërbim të mbrojtjes, sigurisë dhe paqes,” tha Kryeministri i Kosovës duke konstatuar përparim në përfshirje më të madhe të komuniteteve në institucionet e sigurisë.
Duke e konsideruar diversitetin vlerë, ministri i Punëve të Brendshme, Xhelal Sveçla, tha se dyert e institucioneve të sigurisë janë gjithmonë të hapura për ata që duan të jenë faktorë në ofrimin e sigurisë.
“Në historinë e themelimit të institucioneve tona dhe në ngritjen e kapaciteteve tona, pjesë e pandashme është kontributi nga të gjitha komunitetet,” tha Sveçla.
Ministri për komunitetet dhe kthim, Nenad Rashiç, tha se Akademia është simbol i bashkëpunimit për të ardhmen.
“Kjo Akademi, mua më simbolizon një fillim, një bashkëpunim, për te gjithë për një përparim, për një zhvillim dhe për të ardhmen dhe me që jemi në këtë vend nuk e di se ku do të ishte vendi më i përshtatshëm për ju rini se që të jeni këtu,” tha Nenad Rashiç.
