Shefi i FBI-së: Rusia vazhdon të nxisë përçarje në SHBA
Drejtori i FBI-së, Christopher Wray, ka thënë se Rusia vazhdon të përdorë lajmet e rreme, propagandën dhe operacionet fshehta për të nxitur mosmarrëveshje në Shtetet e Bashkuara.
Duke folur në punimet e Forumit për Siguri në Kolorado më 18 korrik, Wray ka qëndruar mbrapa përfundimeve të agjencive amerikane të inteligjencës se Moska ka ndërhyrë në zgjedhjet presidenciale të vitit 2016 dhe ka kundërshtuar pretendimet e presidentit rus, Vladimir Putin se Rusia nuk ka qenë e përfshirë.
“Ai ka pikëpamjen e tij. Unë po ju tregoj qëndrim tim”, ka thënë Wray.
“Pikëpamjet e komunitetit të inteligjencës nuk kanë ndryshuar. Qasja ime nuk ka ndryshuar”.
Wray po ashtu ka hedhur poshtë ofertën e Putinit për të krijuar qasje në 12 zyrtarët ushtarakë të inteligjecës ruse, të cilët janë paditur nga autoritetet amerikane për ndërhyrje në zgjedhje, në këmbim të intervistimit të disa qytetarëve amerikanë që Rusia i ka akuzuar për krime të paspecifikuara.
Shtëpia e Bardhë ka thënë se është duke konsideruar ofertën, mirëpo Wray e ka hedhur poshtë të njëjtën.
Deklaratat e shefit të FBI-së kanë ardhur pas konfuzionit në Washington rreth asaj nëse presidenti amerikan, Donald Trump pranon përfundimet e agjencive amerikane të inteligjencës dhe nëse ai beson se Moska është duke synuar ende të ndërhyjë në zgjedhjet amerikane dhe të kërcënojë infrastrukturën kombëtare.
