Zyrtare/ Ja kush do të jetë Ambasadori i ri i BE-së në Shqipëri

Luigi Soreca emërohet ambasador i Bashkimit Europian në Shqipëri, duke zëvendësuar në këtë mënyrë Romana Vlahutin.

Përfaqësuesja e Lartë e BE-së, Federica Mogherini, shpalli emërimet e 24 ambasadorëve në disa vende, përfshirë edhe Shqipërinë.

Soreca prej vitesh punon në nivele të larta në Bruksel dhe ka qenë i angazhuar me Shqipërinë gjatë procesit të liberalizimit të vizave.

Luigi Soreca është Drejtor i Sigurisë në Komisionin Evropian.

Ai është njohës i mirë i çështje të sigurisë, i legjislacionit në luftën kundër terrorizmit, krimit të organizuar, korrupsionit dhe krimeve të tjera të rënda, dhe ka punuar me EUROPOL dhe CEPOL.

Veç liberalizimit të vizave me Shqipërinë ai ka udhëhequr këtë proces edhe me Marokun, Tunizinë apo me Federatën Ruse.

Ai ishte përgjegjës për menaxhimin e Qasjes Globale ndaj Migrimit dhe Lëvizshmërisë si dhe për të tjera aspekte ndërkombëtare të migracionit.

Duket se një nga prioritetet e punës së tij në Shqipëri është Reforma në Drejtësi, si dhe çështjet e sigurisë, përfshi këtu luftën ndaj drogës.