BE, ndryshime të mëdha për drejtuesit e automjeteve, ja detajet
Ministrat e Transportit të shteteve anëtare të Bashkimit Europian, BE, kanë miratuar qëndrimin e përbashkët mbi rregullat e rejaj për sigurinë në rrugë, që përfshinë edhe direktivën për patentat e shoferit dhe shkëmbimin e informacioneve për shkeljet në trafik.
Patent shoferi digjitale
Në muajin mars të këtij viti, në kuadër të paketës ligjore për sigurinë rrugore, Komisioni Europian ka propozuar futjen e patentës së përbashkët digjitale për drejtimin e automjetit në BE dhe rregullat e reja që do të lehtësojnë pagesat e gjobave në shtetin tjetër anëtar të BE, si dhe pezullimin e patentës së shoferit.
Komisioni Europian gjithashtu ka propozuar që shoferët e rinj pa i mbushur 17 vjeç mund të japin provimin dhe të drejtojnë automjetin nëse janë të shoqëruar me shofer me përvojë, që të vendoset periudha e provës për shoferët e rinj për të paktën dy vite pas dhënies së provimit dhe rregullit të tolerancës zero për drejtimin nën ndikimin e alkoolit për shoferët e rinj.
Edhe pse shoferët e rinj janë vetëm 8 për qind e të gjithë shoferëve që ekzistojnë, dy prej pesë aksidenteve me fatalitet përfshijnë shoferët më të rinj se 30 vjeç.
Këshilli i BE në qëndrimin e tij ka pranuar shumicën e rregullave nga propozimi i Komisionit Europian, duke parashikuar ndryshimet e caktuara sa i përket periudhës së provës për shoferët e rinj, e ku vlejnë rregullat e shteteve anëtare.
Patent shoferi me afat më të shkurtër
Në qëndrimin e përbashkët të shteteve anëtare, në bazë të të cilit do të negociohet me Parlamentin Europian mbi tekstin përfundimtar të ligjit, gjithashtu parashikohet të shkurtohet afati i vlefshmërisë së patent shoferit dhe për shoferët e vjetër të ngelet në bazë vullnetare.
Vendosen dhe rregullat më të qarta mbi aftësinë fizike dhe psiqike për drejtimin e automjetit.
Gjithashtu parashikohet që personat të cilët kanë shtetësi të një shteti anëtar, dhe qëndrim të përhershëm në vendin tjetër anëtar, mund të japin pjesën teorike të provimit për shofer në vendin nga e ka shtetësinë, por kjo mundësi nuk parashikohet për pjesën praktike të provimit për shofer.
Zgjerimi i listës së shkeljeve në trafik
Propozohet edhe zgjerimi i listës së shkeljeve në trafik të cilët gjobiten në nivel të BE. Lista aktuale përfshinë gjithsejë tetë shkelje ndër të cilat tejkalimi i shpejtësisë, mospërdorimi i rripit të sigurisë, kalimi në semafor të kuq, drejtimi nën ndikimin e alkoolit dhe drogës, mosmbajtja e kaskës mbrojtëse, lëvizja në korsinë e ndaluar dhe përdorimi i celularit ose pajisjeve tjera të komunikimit gjatë drejtimit të automjetit
Propozimi i ligjit për shkëmbimin e informacioneve mbi shkeljet në trafik do të mundësoj që vendimi mbi pezullimin e patentës së shoferit në një vend anëtar të zbatohet në të gjitha shtetet anëtare, që aktualisht për shkak të boshllëkut ligjor shpesh nuk ndodhë. E njejta gjë vlenë edhe për shkeljet tjera në trafik që do të jenë të dënueshme në nivel të BE.
Ndryshe, javën e kaluar, Këshilli për trafik dhe turizëm i Parlamentit Europian ka miratuar draftet e qëndrimit mbi paketën ligjore mbi sigurinë në rrugë. Mbi këto drafte, Parlamenti Europian do të votoj në seancë plenare e cila mbahet në muajin dhjetor, e pas kësaj kryesuesja belge do të filloj negociatat me përfaqësuesit e Parlamentit mbi tekstin final të ligjit.
