HEC-et e vegjël, çmimi i energjisë për 2024 qëndron sërish në 10 lekë/kWh
Enti Rregullator i Energjisë miratoi sot çmimin e të energjisë për prodhuesit me përparësi për vitin 2024 duke e lënë atë në nivelin 10 lekë/kWh.
Çmimi mbeti i njëjtë me atë që prodhuesve po ju paguhet nga muaji i dytë i këtij viti teksa në këtë kategori janë HEC-e deri në 15 MW të cilët janë vendosur aktualisht në regjimin e shërbimit publik.
Bordi i Komisionerëve i Entit mori këtë vendim pas analizës së bërë nga drejtoria përgjegjëse në këtë institucion ku u analizua mënyra sesi llogaritet çmimi.
Konkretisht bazuar në metodologji që ka në bazë bursën e Hungarisë, koeficient si dhe element të tjerë çmimi që rezultoi nga formula ishte 14.49 lekë. Ky çmim sipas Entit qëndron mbi nivelin maksimal ndaj çmimi i caktuar që do të aplikohet është ai i 10 lekëve/kWh.
Për konvertimin e vlerës në euro që rezulton në treguesin që merret nga bursa e Hungarisë u përdor kursi zyrtar i Bankës së Shqipërisë që për periudhën janar-nëntor rezulton me një mesatare 108.34 lekë.
Enti argumentoi se ky mund të rishikohet pas publikimit të plotë të raportit vjetor të Bursës së Hungarisë mbi çmimin mesatar si dhe kursin e BSH në fund të vitit.
Formula e përllogaritjes së çmimit
Përllogaritjet e çmimit për HEC-et e vegjël që kanë detyrimin e shitjes së energjisë tek kompania publike e shpërndarjes llogariten mbi bonusin e promovimit, çmimi i HPEX sipas raportit vjetor, kursi mestar i euro nga Banka e Shqipërisë.
Për vitin 2023 çmimi rezultoi rreth 14.5 lekë duke pësuar një ulje të ndjeshme në raport me mesataren e vitit 2022 kur kriza çoi çmimet të nivele të jashtëzakonshme. Ky çmim mesatar ishte ]38.97 lekë/kWh.
Çmimet e dy viteve të fundit nën efektin e krizës duket se janë mbi çmimin maksimal prej 10 lekë. HEC-et e vegjël aktualisht janë të detyruar të shesin energjinë vetëm tek kompania publike për shkak se ende jemi në gjendjen e emergjencës në furnizim e cila është në fuqi deri në fund të këtij viti.
Kriza e energjisë edhe pse me një trajektore më të zbutur sa i takon çmimeve sërish nuk konsiderohet e larguar si rrezik duke bërë që vendet të vijojnë të kenë vigjilencë të shtuar./Monitor/
