Këshilli i Përgjithshëm i LVV-së, Kurti: Të jemi më afër qytetarit!
Në mbledhjen e 53-të të Këshillit të Përgjithshëm të Lëvizjes Vetëvendosje, kryetari dhe kryeministri aktual, Albin Kurti, ka kërkuar angazhim të shtuar nga të gjithë aktivistët e partisë që drejton.
“Viti 2024 për të gjitha qendrat tona duhet të jetë vit i përgatitjes dhe mobilizimit për zgjedhjet në vitin 2025, me theks të veçantë për nivelin lokal,” tha Albin Kurti duke shtuar se ai i cili synon të jetë në krye të komunës nuk mund të jetë kandidat pa e njohur problematikën komplete të komunës ku kandidon.
“Duhet të jemi afër me qytetarin përmes komunikimit dinamik. Shumë nga lajmet e vendimet që merr qeveria jonë nuk paraqiten fare ose në rastin më të mirë paraqiten pjesërisht në pjesën dërrmuese në spektrin mediatik të vendit tonë. Ne nuk e kemi zgjedhur dhe as nuk do të zgjedhim metodat e pararendësve tanë për sponsorizime që në thelb janë fasadë. Ne kemi komunikuar në vazhdimësi me qytetarin. Nuk e kemi ndërprerë asnjëherë komunikimin me ta, prandaj të arriturat e qeverisë, vendimet qe merren, duhen prezantuar të qytetarët nga strukturat e Lëvizjes,” tha Kryetari i Lëvizjes Vetëvendosje duke kërkuar identifikimin e problemeve me të cilat ballafaqohen qytetarët që të përgatiten programe zgjedhore që përmbushin kërkesat e tyre.
Me këtë rast, Kurti ka lavdëruar punën e kryetarëve komunal nga radhët e Lëvizjes Vetëvendosje, duke ftuar aktivistët e mbarë qendrave të Lëvizjes nëpër Kosovë që t’i kenë model kryetarët në Podujevë, Gjilan e në qendra të tjera ku kjo parti udhëheqë.
Kurti ka folur edhe për arritjet në Kosovë nën udhëheqjen e partisë së tij, duke theksuar se të gjithë duhet të jenë krenarë për sukseset e qeverisë.
“Kemi përmbushur një premtim të kamotshëm të partisë sonë -themelimin e Fondit Sovran. Ky fond do t’i forcojë ndërmarrjet publike dhe do të shtojë kapitalin investiv në ekonominë tonë,” tha Albin Kurti ndërsa për buxhetin e vitit 2024 shtoi:
“Buxheti ka kapur vlerën prej 3 miliardë e 314 milionë euro, që është buxheti më i madh që ka pasur Kosova ndonjëherë. Nga fillimi i mandatit në vitin 2021 buxheti është rritur 35%,” tha Kurti ndërsa përmendi fushat e ekonomisë, shëndetësisë, drejtësisë e sundimit të ligjit, arsimit, energjisë e bujqësisë ku, sipas tij, qeveria nën drejtimin e tij ka arritur suksese të mëdha.
Në fund, Albin Kurti foli edhe për dialogun që po zhvillohet në Bruksel dhe raportet me Serbinë.
“Me qeverinë e VV-së ne kemi arritur një marrëveshje të re që flet për integritetin territorial të Kosovës si shtet sovran, të cilit dokument Serbia po i ikë, po refuzon ta nënshkruaj e javën që po lëmë pas edhe zyrtarisht bëri të ditur se nuk do ta zbatojë në plotni.”
