Opozita protestë në Beograd, liderët futen në grevë urie deri në anulimin e zgjedhjeve

Një numër i madh qytetarësh protestuan sot në qendër të Beogradit, duke kërkuar anulimin e zgjedhjeve që u mbajtën dje në kryeqytetin serb.

Koalicioni opozitar “Serbia kundër dhunës” e thirri këtë protestë, raporton RFE pasi pretendon se fitorja e Partisë Përparimtare Serbe, SNS, në pushtet në Beograd “është rezultat i vjedhjes së zgjedhjeve”.

“Ne nuk duam dhe nuk guxojmë t’i njohim zgjedhjet në Beograd, sepse janë kundër ligjit, janë keqpërdorur njerëz nga vendet e tjera”, tha përfaqësuesja e koalicionit “Serbia kundër dhunës”, Marinika Tepiç, gjatë protestës para selisë së Komisionit Qendror të Zgjedhjeve.

Ajo deklaroi se koalicioni i saj ka “dhjetëra mijëra prova” për rishkrimin e vullnetit elektoral të qytetarëve.

“Ne kemi prova dhe kërkojmë anulimin e zgjedhjeve të Beogradit,” tha Tepiç para se disa nga përfaqësuesit e koalicionit opozitar të hynin në selinë e KQZ-së për ta paraqitur kërkesë për anulimin e zgjedhjeve.

Dy liderë opozitarë shpallin grevë urie

Marinika Tepiç bëri të ditur se, ajo bashkë me një tjetër kryesuese të listës “Serbia kundër dhunës” Miroslav Aleksiç, do të futen në një grevë urie deri në, siç tha ajo, anulimin e zgjedhjeve.

Demonstruesit para hyrjes së KQZ-së fishkëllyen dhe brohoritën: “Nuk do të japim fitore”, “Tradhti”, “Hajna”, si dhe hodhën vezë, domate dhe letra higjienike në drejtim të ndërtesës së komisionit.

Një incident, raporton RFE, ndodhi për një çast kur një grup i vogël protestuesish tentoi ta thyente një gardh mbrojtës që ishte vendosur para selisë së komisionit.